I.

1. Dalfin, sabriatz me vos [Peirol]
2. mostrar raçonablamen
3. cant a pro domna valen
4. drutz cortes e pros,
5. cora s’eschai
6. que l’am plus ab cor verai
7. can loi a fait o enan?
8. Digaz me vostre scemblan.

II.

9. Peirol, leus m’es lo respos, [Dalfi]
10. car ben sai certanamen
11. c’amistatz per jauvimen
12. creis, et es razos
13. que maior jai
14. a druz pos sidonz o fai;
15. e·l granz jois, c’a senz enjan,
16. fai ades l’amor plus gran.

III.

17. Dalfin, ben sai e conos’ [Peirol]
18. c’om, pos ama finamen,
19. mor ades tro que·l joi pren
20. don plus es coitos.
21. E pos estai
22. lo desirs, c’oltra non vai;
23. non cre de negun aman
24. que pois am a fin talan.

IV.

25. Peirol, aizo metez jos, [Dalfi]
26. c’aprop l’afaire plazen
27. trobam fin aman soven
28. moult plus volontos;
29. c’amors atrai
30. aprob lo joi grant esmai,
31. e menbre vos de Tristan
32. c’ab Yseut murit aman.

V.

33. Dalfin, vers es que·il poisos [Peirol]
34. que lor det beure Bragen
35. la nueit per descausimen
36. lo fei angoissos;
37. mas de me sai
38. c’acaisonaz en serai,
39. e ben leu aura·i mi dan
40. car manteing ma razon tan.

VI.

41. Peirol, remaigna·il tenzos, [Dalfi]
42. car vos o faitz ben parven
43. c’amaz falsetaz cubren:
44. daz vos acaisos!
45. Ja non creirai
46. que druz cortes non am mai
47. sidonz, pos non vai gardan
48. ves lei de ren que·il deman.

VII.

49. Dalfin, non sai, [Peirol]
50. mas bon conseil vos darai,
51. que si ben non l’ama tan
52. sevals facha·n lo scemblan.

VIII.

53. Peirol, ben sai [Dalfi]
54. e reconogut vos ai:
55. que leials annaz jugan
56. segon vostre cor truan.