Uguet  ·  Reculaire

Scometre·us vuoill, Reculaire;

pois vestirs no·us dura gaire,

de paubretat es confraire

als bons homes de Laun;

5

mas de fe no·m semblatz un,

que vos etz fols e jogaire

e de putans governaire.

N’Uget, auzit ai retraire

qu’uns temps er, ço m’es vejaire,

10

que l’aursfres e·l gris e·l vaire

n’iran ab lo fum tot un;

per qu’ieu non ai mon estrun

en aver, don sui burlaire,

e chascus degr’aissi faire.

15

Reculaire, fols seria

totz hom que d’aiso·us creiria;

vos cuidatz que be·us estia,

quand al joc vos despoillatz,

e, qan fai freich, tremolatz,

20

e cridatz: “Qi·m prestaria

son mantel, ie·l li rendria.”

N’Uget, ben sai, s’ieu moria,

c’atretan m’en portaria

co·l plus rics reis q’el mon sia;

25

per q’ieu sec mas volontatz,

e jogui ab los tres datz,

e pren ab los conz paria,

et ab bon vin, on q’ieu sia.

Reculaire, qi·us donava

30

cinc solz e pois en gitava

autres cinc por en la grava,

detz solz auria perdutz;

mentre c’aissi viuretz nutz

e cujatz, si be·us estava,

35

vos prezes qi·us encontrava?

N’Uget, ben paraula brava

m’avetz cum si re·us costava

mos jocs, e s’ieu amassava

tal aver don fos perdutz

40

l’esperitz ni deceubutz,

dirion que mal estav’a

·l bon homen de Calatrava.

Reculaire, eu sui drutz

de tal, si dire l’ausava,

45

q’es la genser c’om mentava.

N’Uget, et eu vauc si nutz,

que laire, si m’encontrava,

no·m tolria si no·m dava.