Bermon Rascas (104.1)

		Bermon Rascas
		Dieus et amors et merce
		e chauzimenz e sufrenza,
		ara·us qier, si·us platz, valenza,
		q’anc tant destregz, per ma fe,
5		no·us qis mais neguna re.
		Mas amors no sap qe s’es
		mals plus q’ieu sai qe s’es bes.
		Dieus li don mal, s’amors pot mal aver,
		et a mi forz’e poder,
10		q’encontra leis posca trobar guirenza,
		tant q’il m’oblit del tot o q’ieu la venza.

		Mas ben tost ac vencut me
		qant vi sa bella parvenza
		e sa gaia captenenza:
15		aissi m’ac vencut dese
		q’ieu non aic poder e me.
		A sol aizo par qe volpilla es
		amors: car antz non conqes
		leis q’es tan fortz qe non la·l cal temer.
20		Mas tant a mes son poder
		e mi amors q’ieu non ai mai crezenza
		c’autr’amador ni autr’amairitz venza.

		E pos de mi no·il sove,
		ni mos preiars non l’agenza,
25		nul’aus qerre covinenza;
		e·il platz q’enaissi·m malme
		qe·m vede·l solatz de se.
		Ar n’auran gaug lauzenjador plaides
		s’ieu non son gais ni cortes;
30		e si tan perc, ben deu mos dantz parer
		e mos solatz remaner
		s’en leis non hai respiec ni entendenza,
		ni autr’amors non a poder qe·m venza.

		Amors non sai don si·ns ve,
35		car, segon autra naiscenza,
		no fenis ni no comenza;
		c’us esperitz q’om no ve
		es e cel qe plus la cre
		es enganatz e trahitz e mespres.
40		Car, se conoiscenz’agues,
		ja no·il plagra tan del meu dechaer.
		Mas ieu en dirai lo ver:
		ren mas los sieus non torn’en dechaenza
		qan dels autres non a poder qe venza.