Bernart Marti (63.5)

		Bernart Marti
		Companho, per companhia
		de folor,
		soi d’amor en gran error:
		laidament romp e deslia
5		e·l jovens qu’en leis se fia
		vai marritz
		pels amadors apostitz.

		Ma part ai en la folia,
		chantador,
10		quar anc fui proatz d’Amor,
		c’al comensar me fon pia
		mas era·m torn’en bauzia
		tot quan ditz,
		per que·m tenc per avelitz.

15		Mas ab bel mentir prendia
		ses clamor,
		no tem mais escarnidor,
		qu’ela ditz ver quan mentia
		et ieu ment can ver dizia.
20		A envitz
		rema lo drutz esbaitz.

		Pos a trichamen s’aillia
		trichador,
		trichem tug, dompnejador,
25		que·l trichars abaisaria
		mas lo trichament: ceria
		feblezitz
		lo trics de la trichairitz.

		Mas a enguan se vezia
30		ses paor
		. . . . . . . . . . .
		enguanat enguanaria,
		enguanatz de felonia
		vai garnitz
35		com enguan enguanairitz.

		Pero per conseill faria
		la leujor
		Bernart Martin lo Pintor
		que ditz e trai guirentia:
40		«Greu er amor ses putia
		camjairitz,
		tro que·l mons sia fenitz».

		Uzatges es, c’om en ria
		o qu’en plor,
45		anc nuils hom a dezonor
		non fes plag en drudaria,
		per qu’ieu penrai de la mia,
		totz aunitz,
		lo be que·m n’es escaritz.

50		Eu n’aurai la senhoria
		en pascor
		quan so·l ram carguat de flor,
		tals pot esser l’escaria,
		qu’encaras reverdiria
55		la raitz
		e·l verguans estes floritz.