Bernart Marti (63.8)

		Bernart Marti
		Quan l’erb’es reverdezida
		els pratz de lonc lo vivier
		e·l rossinhols brayl’e crida
		e son florit li vergier,
5		adoncx par que·l temps s’esclaire
		quan hom au las ranas braire
		el maresc e per lo riu.

		Si ai amor encobida
		e mes tot mon cossirier
10		que ja no vuelh a ma vida,
		mon grat, far autre mestier,
		qu’anc pus nasquey de ma maire
		no volgui autr’obra faire
		ni d’autre labor no viu.

15		Mas ieu n’ay una cauzida
		que no m’en fai desturbier,
		mas be m’a sa fe plevida
		et yeu jurat al mostier
		l’ai fe don no·m puesc estraire,
20		tan li suy fizels amaire
		ses falhir, so·us jur e·us pliu.

		Dormit a, si no·s rissida,
		en oblit un an entier
		e no·m pretz, s’illa m’oblida,
25		mais tot lo mon un denier.
		Ara la·m gar sains Salvaire,
		qu’om non la·m puesca sostraire
		ni per autre no·m esquiu.

		S’illa·m fai breu cossentida
30		d’aquo dont ai dezirier,
		qu’ieu la bays nud’o vestida,
		ja autra ricor non quier:
		assatz val mais qu’emperaire
		si desotz son mantel vayre
35		josta son belh cors m’aiziu.

		Blanch’e grayl’et escafida
		es ses coratge leugier,
		doussa e fresqua e colorida
		cum flors de may en rozier,
40		corteza e de bon aire,
		e non suy de re guabaire,
		qu’assatz n’es plus qu’ieu non diu.

		Una gancha trassaillida
		me fon dig que·m fes l’autrier,
45		s’es de bel mentir garnida
		que mon ver fai mensongier.
		Los forfaitz, qu’ieu non pres gaire,
		no vueill auzir ni retraire
		c’om no m’aia per auriu.

50		Car si·n fauc fol’esbrugida
		e trop gran vertat l’enquier
		si auran m’amor delida
		e vieillas e lauzengier.
		Qui·s vol, s’en fassa janglaire,
55		mas mi apel, quan repaire,
		son bon amic senhoriu.

		N’Eblon man ves Marguarida,
		lo vers per un mesatgier,
		qu’en lui es amor jauzida
60		de don’e de cavalier.
		Et ieu soi sai ajustaire
		de dos amicx d’un vejaire,
		N’Aimes e·n l’Estrebesquiu.

		N’Aimes e·N l’Estrebeschaire
65		son dui amic d’un vejaire
		. . . ab l’Entrebeschiu.