Folquet de Marselha (155.12)

		Folquet de Marselha
		Ja non volgra q’hom auzis
		los dousz chan[s] de[l]s aucellos
		mas cill qi son amoros,
4		qe res tan no m’esbaudis
		co·ill aucellet per la plaigna
		e·ill bella cui soi aclis:
		cella·m plasz mais qe chancos,
8		volta ne lais de Bretaigna.

		Be m’agrada e m’abellis,
		mais no soi aventuros,
		q’ades es hom cobeitos
12		de cho q’es plus grieu conqis;
		donch qe·m val ni qe·m gazaigna
		s’ieu l’am e ill no·m grazis!
		Amarai donch en-perdos?
16		oc ieu, anceis qe remaigna.

		Be m’estera s’ades vis
		lo sieu bel cors, gai, joios;
		e qan no vei sas faichos
20		si be·m soi en mon pais,
		cuig esser loing en Espaigna
		preon entre Sarrazis;
		sol lo veszer m’en es bos
24		q’als no aus dir qe re·m taigna.

		Ferms soi eu be qar soi fis;
		qe s’ieu foss fals ne gignos
		ieu n’hagra pro compaignos,
28		mais sa beltatz e·l dolz ris
		mi tolon de lor bargaigna;
		qar ill val tan, cho·us plevis,
		qe si sol merces i fos
32		ren als no es qi·m soffraigna.

		Be volgra qe Limozis
		fos plus prop de Mauretaigna,
		per cho qe plus sove vis
36		lo seinhor q’es larcs e pros
		e tan de bona compaigna.