Folquet de Marselha (155.13)

		Folquet de Marselha
		Meravill me cum pot nuills hom chantar
		si cum ieu fatz per lieis que·m fai doler,
		qu’e ma chansso non puosc apareillar
4		dos motz qu’al tertz no·m lais marritz chaser,
		car non sui lai on estai sos cors gens,
		doutz e plazens,
		que m’auci desiran
8		e non pot far morir tant fin aman.

		E car non puosc nuilla ren tant amar,
		ella, si·l platz, non deu ma mort voler,
		c’anc, puois la vi, non puoc d’alre pensar
12		mas cum pogues far e dir son plazer;
		et es ben dreitz, qu’al laus dels conoissens
		es plus valens:
		per qu’ieu n’am mais l’afan
16		de lieis servir que d’autra aver joi gran.

		Las! ieu non l’aus mon messatge enviar,
		ni tant d’ardit non ai qu’ieu l’an vezer;
		e non o lais mas car vuoill far cuidar
20		als fals devins qu’aillors ai mon esper:
		pero·l desirs m’es ades plus cozens
		e·l pessamens,
		car ieu no·il sui denan
24		mas jongz, aclis, per far tot son coman.

		Lo mals qu’ieu trac no·m pot desconortar
		tant la fai pretz sobre totas valer,
		ni negus hom no la pot trop lauzar;
28		Dieus don qu’il vuoilla humilitat aver,
		si cum en lieis es proeza e jovens,
		beutatz e sens,
		c’anc dompna no·n ac tan:
32		doncs, cal tort n’ai s’ieu nuill’autra non blan?

		Bella dompna, tant vos am e·us tenc car
		que maintas vetz lo jorn no·m puosc tener
		c’az una part no m’an totz sols plorar,
36		si qu’ieu no·m puosc d’una pessa mover,
		tal paor ai no·m vailla chausimens;
		car plus me vens
		vostr’amors sospiran
40		qu’eu no sai dir ni retraire en chantan.

		Qu’ie·us sui gairens
		plus vos am ses engan
		no fetz Yseutz son bon amic Tristan.