Garin d’Apchier (443.4)

		Garin d’Apchier
		Mos Cominals fai ben parer
		que, si el pogues dir ni far
		cauza que·m degues enuiar,
		elh en faria son poder:
5		mas paubreir’e vilenc l’assalh
		e poders e jovens li falh,
		per c’als guerriers non fai paor;
		e non a amic ni senhor
		que no·l tenha per enoios,
10		mas tan can ditz nostras tensos.

		E s’ieu lo voill ben dechazer,
		que·l voilla tolre mon chantar,
		ja non er qui·lh don a manjar
		ni·l voilla albergar un ser:
15		mas metrai lo chan dins serralh
		per qu’el soven trembl’e badalh.
		Que la verchiera de s’oisor
		vendet, don son gai mant pastor,
		car lai vivi’ ab sos lairos
20		emblan las fedas e·ls motos.

		Anc ab armas no saup valer
		hom mens, tan se·n volgues lauzar,
		ni als guerriers, mas ab parlar,
		no saup hom mens de dan tener:
25		mas soven mou guerr’e assalh
		a sels que an croz e sonalh,
		don mil monge dins refeitor
		preian, ploran, nostre Senhor,
		qu’en Pons Tortz e’n San Laurens fos,
30		si com es, vielhs e sofraitos.

		Lialtat sol mot mantener
		e falsedat tostems blasmar,
		mas al Tornel la·i vim laissar
		e del tot metr’en non chaler;
35		per que ditz lo paire n’Eralh
		que home qui nafre e talh
		e prenda son lige senhor
		ni·l removia castel ni tor
		no·l deu mantener nuls homs bos,
40		per qu’el no·l manten ni·n Randos.

		Ja nulh marit non cal temer
		de lui ni sa molher gardar,
		ans lo pot laissar domneiar
		et estar ab leis a lezer;
45		que cal que·l debois ni l’entalh,
		deboissar lo pot d’aital talh:
		ses pel, ses carn e ses color
		e ses joven e ses vigor;
		e d’ome qu’es d’aital faisos
50		non deu esser maritz gelos.