Gavaudan (174.11)

		Gavaudan
		Un vers vuelh far, chantador,
		cubert e clus, per vezer
		greu e leu entendedor
		lai on sens vol apparer;
5		per so ja us no·n gap ni·n crit
		tro n’aya la flor triada
		que·l nesci agra tost delit.
		E·l no sabens muza e bada
		quan savieza·l bistensa.

10		Ja non dey per la calor
		mon coratge retener
		de so don suy en error,
		que selh mal, don piegz esper,
		per tot lo segle aug brugit.
15		Per mort, al viu desguizada,
		que s’esgau quan al temps auzit
		foldatz, que·ns er prezentada,
		qui sai non a quist guirensa?

		Grans esfreys senes paor
20		vey del ver, pretz remaner
		et als, sas, querre dolor
		que·ls fa d’aut en bas cazer.
		Selh qu’an fin joy mes en oblit
		per estranh’ira privada,
25		ans que ayon nou vielh complit
		ni la cuyd’a far tomada,
		er lur segurtatz fallensa.

		Qui sec lo camin major
		per clar jorn pren escur ser;
30		e passon tug li pluzor,
		que paucx ni vey remaner:
		et ans que sian avertit
		er trop corta la jornada.
		Per lonc voler dezenantit,
35		qu’espan quo fai la rozada,
		menan folla captenensa.

		Issoblit de peccador
		per messonja laissa·l ver;
		l’engans fer l’enganador
40		si tot l’acueih son plazer
		e quan l’a un pauc ressentit
		al pus fa sa trascambada;
		e quan l’a el vas sebellit
		sa razos l’es cambiada:
45		dos en amar s’a valensa.

		Dompnas e drut e senhor
		an erguelh que·ls fa doler
		e lauzengier bauzador
		an trop en mal dir lezer,
50		quar per lo frug li fals falhit;
		es bona fes eyssauzada
		e·l motz fatz l’estratz qu’a trazit:
		de proeza n’an tomada,
		non an valor ni sufrensa.

55		So·ns retrazon li auctor:
		«Fals’amistatz tolh poder
		de servir a fin’amor,
		qui·s va ab lieys captener».
		Yeu ai nel sordey cauzit,
60		quar tan la n’ai sopleyada;
		tost ac Samson afrevolit
		e fa tota la linhada
		que pres d’en Adam nayssensa.

		Mas Dieus m’en a tant escarit
65		que·m n’a membransa donada:
		non deu perir ma semensa.