Gavaudan (174.4)

		Gavaudan
		Dezamparatz, ses companho
		e d’amor luenh del tot e blos,
		cavalgava per un cambo,
		iratz e tristz e cossiros,
5		lonc un bruelh, tro joys mi retenc
		d’una pastoressa que vi;
		per qu’es mos joys renovellatz,
		quan mi remembran sas beutatz,
		que anc pueys d’autra no·m sovenc.

10		Tost dissendei sobre·l sablo
		e vinc vas lieys de sautz coytos.
		Elha·m ders un pauc lo mento;
		ab un dos ris, ferm amoros,
		me dis: «Senher, cossi·us avenc
15		que·us trastornessetz sai vas mi?
		Quo·us etz tan de mi adautatz?
		Qu’ieu no say que s’es amistatz,
		per que·m luenh de vos e m’estrenc».

		«Toza, joys mi dona razo
20		per qu’ieu suy sa vengutz a vos.
		Quan me mostretz vostra faisso,
		sobre totz jauzens fuy joyos;
		per que mon cor fortz e destrenc
		ab vostr’amor, vas cuy m’acli.
25		E sia volgutz et amatz
		lo mieus joys e·l vostre, si·us platz,
		que jamais no rompa ni trenc».

		«Senher, si m’amistat vos do,
		yeu aurey nom na Malafos,
30		qu’ieu n’esper melhor guizardo
		d’autre que cug qu’en breu m’espos.
		Dar vos ey est cairelh que tenc!
		E tornatz en vostre cami,
		qu’ab autras vos etz ensajatz,
35		per semblan, don etz galiatz,
		falsas, que fan ric joy sebenc».

		«Amiga, no·us dic oc ni no
		de las falsas ab cor ginhos;
		tan me platz de vos e·m sap bo,
40		que totz mals davers m’en es pros.
		En qual que·us vulhatz vos o prenc,
		que ieu vos plevisc e·us afi
		que vostres suy endomenjatz;
		e faitz de mi so que·us vulhatz,
45		neys lo cor traire ab un brenc».

		«Senher, qui messonjas a pro
		a semblan de ver non es tos.
		La saviez’a Salamo
		aondera, s’amors no fos,
50		que mur e forsa e palenc
		fe de sen, et un franh bassi
		no·l valc quan fo apoderatz;
		e pus elh ne fo enganatz.
		Gardatz en vos so qu’ieu ne prenc!»

55		«Amiga, ab autr’ochaizo
		mi tornatz mon joy sus dejos;
		que ja non er ni anc no fo
		q’amors no sia bon’als bos:
		per qu’ieu de ben amar no·m fenc,
60		que·m don’al cor joy clar e fi
		de vos; e prec merce m’ajatz,
		o·m metrey, si m’o alongatz,
		hermitas el pueg de Messenc».

		«Senher, ja prezic ni sermo
65		non aya mai entre nos dos:
		si m’etz amicx, amiga·us so,
		quar tan n’etz lecx et enveyos.
		Yeu gieti foras et espenc
		de mon cor brau erguelh. Camgi
70		tot aissi cum vos deziratz:
		er mos joys al vostre privatz,
		que ses joy no valh un arenc».

		«Amiga, ab tant ey assatz:
		per mil vetz s’es mos joys doblatz,
75		quar en la vostr’amor atenc».

		«Senher, e vos non o digatz,
		si tan dur cor adomesjatz,
		als parliers, gola de blastenc».