Gavaudan (174.8)

		Gavaudan
		Lo vers dech far en tal rima,
		mascl’e femel que ben rim,
		qu’ieu trac lo gran de la palha
		desen qu’om no s’i empalh;
5		e meti selhs en bavec
		de nescia gent baveca
		que tornon dos en amar
		per fals’amistat amara.
		Que gran foc torna belluga
10		si, la morta, tart reviu.

		De bona vit, quan razima,
		deu hom amar son razim
		e siey don, soi no·s trassalla
		lai on putia trassalh:
15		sie·us ditz qu’autre non amec,
		mais vulhatz esser a meca,
		que·l vostre joy dezampar
		lo sieus, tro que·us dezampara.
		E vos, drutz, etz gens faduca:
20		cujatz lur tolre lur briu?

		Sella qu’ab dos s’entressima
		greu er del ters no·s tressim;
		per que joys torn’en baralha
		e ja nuls no s’enbaralh!
25		Que·l gilos, qu’autr’entalec,
		ro cum camels en taleca.
		Et elha ve l’emplecar:
		de l’emplecha vil fa cara;
		qu’a degun non es astruga
30		que·y puesc’aver senhoriu.

		Fals’amors sap tant d’escrima,
		qui ben de lieys no s’escrim
		segurs es de gran batalha,
		cum es lo senhs del batalh.
35		«Calha, folhs», ditz, «ton cavec!
		Assatz m’avetz per caveca!
		Si m’etz escas ni avar,
		ye·us serai del tot avara».
		E ja re de be no·l fuga
40		tro l’a mes el recaliu.

		Yeu suy tan prims a na Grima,
		ja no vuelh denant me grim;
		soven planh, gronh e badalha,
		e son d’engan siey badalh;
45		que·l savi ten per fol pec
		quan l’a tout l’aver ni pecca,
		que pueys no·l denha garar
		e quier n’autre cuy esgara,
		que port aver et aduga,
50		que lo·n fai tornar caytiu.

		Tals es suaus de la prima
		qu’ab enjan agut e prim
		trauc’ausberc de bona malha,
		trabucx e gans e capmalh,
55		e sap tan lati e grec
		qu’oras voles clergua grega:
		per so ja us no·s n’ampar!
		Trahitz es qui lieys ampara:
		l’un huelh tors e l’autre cuga
60		e l’engans forsa·l badiu.

		Pretz enquier qu’om aya lima
		ab que·ls grilhos trenc e lim;
		et yeu fug a la trebalha
		qu’ als sieus fa tostemps trebalh,
65		a jove, vielh e senec.
		Anc Nero, c’aussi Seneca,
		non ac un jorn son cor clar;
		ni fals’amors non declara
		son cor a selh que·s demuga,
70		si tot li jura ni·l pliu.

		Yeu sai mais que buous d’arar;
		mos sens lo crim romp et ara:
		cuy non pot mordre pessuga.
		Vers es bos qui ben l’escriu.

75		Coma naus lo vuelh varar,
		e qui ben l’empenh ni·l vara,
		lo reys N’Anfos lo conduga
		en yvern et en estiu!