Gavaudan (174.9)

		Gavaudan
		Patz passien ven del Senhor
		que per nos pres carn e moric;
		volc nos rezemer del sieu sanc
		que·l fossem ver, fizel amic;
5		per so ja us non s’en estanc
		que usquecx vas Luy non corra.
		Que Dieus nos dona tal conort,
		qu’el segle fals, fallit e mort
		nos mostra patz per sa doussor
10		que fa als bos los mals jauzir
		e·n patz ab patz patz obezir.

		Per aquesta n’aurem major
		patz e vulhatz qu’om vo·n prezic:
		ges non es, ni er, ni fon anc
15		en ergulhos cor, fellon, ric;
		per qu’ieu sospir soven e planc,
		quar non pessam plus abora
		q’us a l’altre no fezes tort
		ni agues ira ni desconort,
20		mas fezes l’us a l’autr’amor
		e cum pocsem a Dieu servir,
		quez Elh nos denhe aculhir.

		Regart deu aver e paor
		qui sap so qu’Elh per nos suffric;
25		vol que siam humil e franc,
		perdonem a nostr’enemic
		per so que de Luy no·ns aranc
		peccatz que fort brama e plora
		quar li premier li son estort;
30		non y a un tan gran ni fort,
		si ca layns, qu’ab gran dolor
		no·l fasson ardre e blezir
		selhs que·ns fan peccar e falhir.

		A nulh home no fan honor
35		ni de lur obra non jauzic
		que no·l tornon d’aut bas, el fanc,
		si co feiro·l premier antic;
		e ja no cug traspas ni manc,
		tart o temps, qu’a mala hora,
40		qui diable sec, non l’aport.
		De cobezeza·ns planton ort,
		de sobre totz mals lo pejor,
		per que·ns podem greu d’elhs partir,
		qui ben no s’en sap escrimir.

45		Peccatz a tan doussa sabor
		per que Adams lo pom trazic:
		del dreg just fey fals, clop e ranc
		cobezeza, que·l ne partic,
		qu’elh era assis en tal banc
50		ja no saupra mals que·s fora.
		E a donat estranh deport,
		ir’e trebalh e desconort,
		a selhs qu’intran el bollidor
		don jamais non poiran yssir.
55		Pensem nos quo·y poirem guerir!

		Sans Pauls dis: «Pus temps nos socor,
		ja us de ben a far no·s tric».
		Qu’el sieu sant, clar, paradis blanc
		Jhezu Crist, que anc no mentic,
60		nos apella, enans que·l tanc.
		. . . . . . . . . . . . . . . . .
		. . . . . . . . . . . . . . . . .
		. . . . . . . . . . . . . . . . .
		Corram lai on tug li doctor
65		s’ acordon que·y podem venir
		ab ben far et ab mal gequir.

		Trichat seran li trichador
		que anc mal per pieitz n’an gequic:
		no·y aura riu, vouta ni tanc
70		als perjurs fals qu’an fe falhic
		que tot denan lor no s’enplanc,
		ni engans que no·ls encorra.
		Selh el fanc cai qu’a lo sen tort
		del diable, quar ab sa sort
75		lo n’a portat a deshonor
		que anc no·l laisset repentir
		en vida ni quan dec murir.

		Dombredieus prec yeu et ador
		qu’Elh nos lais el sieu renc venir,
80		ab sos angils cans novelhs dir.

		Qu’al comte Raimon volha honor
		et forsa dar per enantir
		Pretz, en que totz lo mons se mir.
		Comte, rey et emperador
85		avem luy per Pretz enardir,
		ab patz enantir et sofrir.