Giraut de Bornelh (242.1)

		Guiraut de Bornelh
		A be chantar
		conven amars
		e locs e grazirs e sazos;
		mas, s’eu agues dels catre·ls dos,
5		no cut ja·ls altres esperes.
		Que·l locs me dona joi ades
		e la sazos, desqu’eu sui gais,
		que ges lo tems, can l’erba nais,
		si be se gensa folh’e flors,
10		tan no m’aiud’en mo chantar
		com precs e grazirs de senhors.

		E per amar
		fo ja chantars
		grazitz e pretz prezatz pels pros
15		e fo que sola sospeissos,
		ses altre plus c’om i cudes,
		ensenhava com s’enanses
		vas totz sos benestars d’eslais
		e, que·s mezes en mans assais,
20		com li cregues pretz e valors
		e que·s chauzis de meschabar
		e·lh fos vils senhorils onors.

		Era no par
		que chastiars
25		me valgues ni clams ni tensos?
		Pero no cre c’anc Amors fos
		plus fina, s’amadors trobes;
		que qui per drech la razones,
		ades se melhur’e val mais?
30		C’aissi com par fin’als verais,
		sembla trefan’als trichadors
		e lor engan fa·l nom chamjar;
		que, pos falh, non es fin’amors.

		De chastiar
35		me sui tan pars;
		que pro vetz n’estauc consiros,
		car vei c’ab ponher d’esperos
		no posc tan far que joi cobres.
		Pero, si sos dichs averes
40		Mos Bels-Senher, l’ir’e l’esmais
		qu’eu n’ai sofert, me fora jais
		e fors’e valors e socors
		e deuria s’en plus cochar,
		c’al no deman ni·n volh d’alhors.

45		E s’eu d’afar
		li fos avars
		don m’agues mandat ni somos,
		assatz l’aportera razos
		que ja convens no m’atendes;
50		mas s’eu li sui verais, penses
		si·s tanh que·s volva ni·s biais!
		Que la bona speransa·m pais
		e m’acompanh’ab chantadors
		e m’a dat solatz en trobar,
55		don m’era toltz, cobrar de cors.

		E ges d’avar
		no·m par afars,
		desque trebalhs ni messios
		no·m tol qu’eu no sia joios;
60		c’anc no·m parec que ben anes
		celui cui jois non agrades
		c’anc sens ni poders que joi bais
		no m’agradet ni no m’atrais
		cobeitatz n’irada ricors.
65		E qui que s’apel trop pensar
		saber, eu dic c’ans es folors.

		A mercear
		tanh mercears
		e franquez’als francs amoros
70		e contr’als sobrers orgolhos
		orgolhs e mals, que, si·s gardes
		domn’al traspas, ans que·l passes,
		ja vils ni sobrers ni savais
		no·lh plagra; car no·lh tanh s’apais
75		en tal obra don dezonors
		li remazes, s’a razonar
		la n’aven, entre·ls amadors.

		Senher Sobre-Totz, de colors
		son li drap, e qui·ls sap triar,
80		falh, si compra los sordeiors.