Guiraut Riquier

Lo XXus [= 19] vers d’en Gr. Riquier, l’an MCCLXXXVI en febrier. (19)

Ops m’agra que mos volers

s’acordes ab m’entendensa,

ab sen ez ab conoyssensa,

4

per que·s complis mos espers;

mas no·l puesc apoderar,

ans me fa forssat passar

soven otra mon dever,

8

ab pezar o ab plazer.

E say que per los plazers

va mos cors a dechazensa,

dels pezars port malvolensa

12

e·l tot esme non devers;

e per lo voler blasmar,

no·m puesc ab Dieu escuzar,

quar razos ab bon saber

16

deu en tot penre poder.

Mas non es tals mos poders,

que soven volers no·l vensa

per esper de penedensa,

20

ez aquo non es sabers,

quar mans ne fa trabucar

mortz, en aquelh esperar,

que non an plenier lezer,

24

ez aquo devem temer.

En Dieu sia mos temers

e ma fes e ma crezensa,

e don me tal paciensa,

28

que patz sia mos lezers,

e·l puesca ferms adorar

e lauzan glorificar,

ses d’esperansa cazer,

32

ab fin que·m denh retener.

Quar sos honratz reteners

es de totz plazers creyssensa

e vida ses defalhensa,

36

don temor no fa cazers,

e gaugz ses als dezirar.

Doncx elh, que sols o pot far,

nos don en luy tal esper,

40

que als no puscam voler.

Ses tu, vers Dieus, aizinar

no·ns podem de lunh ben far,

donc fai nos via tener,

44

que vivam al tieu plazer.

Maires de Crist, ton filh car

prega per nos, que·ns ampar

e que·ns garde de cazer

48

a la fin en desesper.