Peire d’Alvernhe

Lauzatz sia Hemanuel, 

lo reys de terr’e de cel,

qu’es trinus et unitatz

e filhs e sancts Esperitz,

e quasqus el payr complitz,

si q’us noms es et us guitz

e Dieus et hom apellatz;

En divers digz assemblatz,

totz en un a trinitatz,

senes sustantia partir;

qu’ayssi tenc l’un per maior

quon l’autre non dic menor,

mas que un sol Dieus azor

e·l prec que·m denh eyssauzir;

Seluy qu’el mon volc venir

per nostres peccatz delir 

e per que·l quatr’elemen

agron dessemblatz semblans:

qu’alre no·i era estans

mas Dieus, que pueys e denans,

qu’anc non ac comensamen

Ni ia fin en negun sen

non aur’, aquel resplanden

de prim destinet als eys

qu’Elh fetz sobr’escur la lutz;

qu’ar ta ferma·s sa vertutz, 

qu’esser non pot descrezutz

ni ren pus aver decreys

En luy que det si meteys

per que·l premiers mals esteys,

qu’era mout grans desconortz

quar selh qu’anc no fes peccat

venc sufrir humanitat

e mort desotz Pons Pilat

e sobre sos vestirs sortz.

Mas ia mais non l’er faitz tortz

ni·l senhorejara mortz,

luy qu’al ters iorn sors del vas,

aissi cum era promes,

per que·l pels d’ifern mal pres

quant als dissipols crec fes

e parec a sant Tomas.

Pueys non say estet tan bas

que de la valh Iozaphas,

d’un pueg desobr’un peiro,

no montes el cel e pus; 

pueys venc l’onzen iorn de sus,

vist soptans e clars e clus, 

als sieus dins una maizo.

Aquelh crey ieu per cui so,

que per nos pres passio

e perdonet al lairo

e qu’es trinitatz et us;

selh que la maire Ihesus

cossellet en la crotz sus,

e qu’es a venir el tro,

Pus lo segle er cofus,

per iutjar los blancs e·ls brus:

aquelh prec ieu que·m escus

e mon cors e m’arma·l do.