Peire Bremon Ricas Novas

Ben dey chantar alegramen,

que·l dous dezir me·n son aiziu

del ric, sobronrat senhoriu

don tenh lo cor e·l cors e·l sen;

5

e qui que·n cosselh ni·n quil,

d’amar vos suy el dreg fil,

don ja no·m partray,

qu’ab fin cor verai

vos mi diey tot, dompna, per ver.

10

Ha! S’er ja qu’ie·us puesca vezer?

Dompna, tug belh captenemen

son el vostre gen cors aiziu,

el honrat quar pretz senhoriu

e·l vostre fag son d’avinen

15

e·l dig plazen et humil

ab guay solatz e gentil.

Ay! Quora·us veyray?

Gran enveja n’ay:

pero, si tot no·us dic plazer,

20

anc re no fetz tam belh vezer.

Anc del vostre belh cors plazen,

si tot miey huelh no·us son aiziu,

pus fuy el vostre senhoriu

pueyssas non aic demembramen;

25

e quar dic ver e non guil,

meravillaran se·n mil.

Plus non despondray,

mas vos sabetz lay

qu’ieu suy sai el vostre poder

30

ab dezir gran de vos vezer.

Mout mi desmentis doussamen

una vetz, qu’ie·us era d’aiziu:

per que del honrat senhoriu

pueys non parti mon ferm talen,

35

que tot mon cor hi apil.

Si qu’en may ni·l temps d’abril

gran joy non auray,

car ges no s’eschai

qu’en Pascor deya joy aver,

40

si doncx no·us anava vezer.

Fals lauzenjador maldizen,

de totz mals siatz vos aiziu,

et hieu del honrat senhoriu

que·m ten, mal vostre grat, jauzen.

45

Trop cujatz esser sotil

d’aquel vostre mestier vil

mas una me·n play

que totz vos dechay;

e quar avetz tan croy saber,

50

l’auzi perguatz vos e·l vezer.

Ben m’alegrerai

ab joy cant veirai

vos, dona, que m’es de plazer,

e de mi per qu’ie·us vuelh vezer.

55

Nulh temps non aigui lezer,

bona dompna, de vos vezer.