I.

1. A, senhor, qui so cuges
2. del segle qu’aissi baiysses!
3. Lo dreytz torna daus l’envers
4. si l’an pres no·s pot levar,
5. ben o feira qui·l tornes
6. el luec on que sol estar.

II.

7. Sist lengua forquat engres
8. lo trastornon tot ades
9. e so·s partit del cofes
10. per amor del tort jutjar;
11. aquist n’an l’alberc e·l ses
12. on fan lur mul establar.

III.

13. Selh qui plus gent sap mentir
14. es ben segurs de garnir
15. d’escarlat ab vert vestir
16. et esperos ab sotlar,
17. mai lor vey deniers offrir
18. que a negun de l’autar.

IV.

19. Mas fezautat fan carzir
20. quar no volon lo ver dir
21. tant si fizon en l’auzir,
22. de caitius desheretar
23. no·s pot a longas jauzir
24. de tort qui no·l vol layssar.

V.

25. Lengua forquat traversan,
26. si·l metetz deniers denan
27. far vos an de gossa can
28. e d’eyssa guiza levar
29. lo dia tro l’endeman,
30. tan son savi del mesclar.

VI.

31. Si·l cujatz el ponh tener
32. e l’avez dat vostr’aver
33. elh o fara assaber
34. a l’autre que·l volra dar
35. per so que sapcha tener
36. lo tort contra·l dreg bayssar.

VII.

37. Lengua forquat de mal lim,
38. ves totas partz avetz crim,
39. gent payssetz vostre noyrim
40. quar sabetz l’engan mesclar
41. e conoyssetz ters e prim
42. al penre et al donar.

VIII.

43. Lengua forcatz, becx agutz,
44. quan totz lo plaitz es vencutz
45. †e lor digz que di aunitz†
46. .  .  .  .  .  .  .  .  .  .  .  .  .
47. ve·us los ab peira batutz
48. et an pro que consirar.

IX.

49. Lengua forcat massador,
50. aquist fals escoutador
51. que fan per autrui honor
52. las companhas ajustar,
53. quals qu’en perda sa valor,
54. lo caitius an pa sercar.

X.

55. Lengua forcat son pejor
56. cel qu’a trait son Senhor,
57. que ri d’aquo c’autre plor
58. e fan la lei cambiar,
59. semblan faun de bufador
60. que pot lo bres eforzar.