I.

1. Bel m’es lai latz la fontana
2. erba vertz e chant de rana:
3. com s’obrei
4. pel sablei
5. tota nueit fors a l’aurei,
6. e·l rossinhols mou son chant
7. sotz la fueilla el vergant,
8. sotz la flor m’agrada
9. dous’amors privada.

II.

10. Dona es vas drut trefana
11. de s’amor pos tres n’apana:
12. estra lei
13. n’i son trei,
14. mas ab son marit l’autrei
15. un amic cortes prezant.
16. E si plus n’i vai sercant
17. es desleialada
18. e puta provada.

III.

19. Mas si·l drutz premers l’enguana
20. – enguans, si floris, non grana –
21. lai felnei
22. ses mercei,
23. mas ben gart no s’ensordei.
24. Qui s’amigua vai trichant
25. trichatz deu anar muzant;
26. amigu’a trichada,
27. pueis: «Bada, fols, bada!».

IV.

28. Be·m det Dieus bon’escarida
29. d’amor si·m fos ben aizida;
30. lai manei
31. e dompnei
32. non es hom que meils estei.
33. Ges non ai mon cor voiant
34. d’amor quan m’en vauc prezant
35. per Na Dezirada,
36. mas trop m’es lunhada.

V.

37. Tant m’es grail’e grass’e plana
38. sotz la camiza ransana,
39. quan la vei,
40. fe que·us dei,
41. ges no tenc envej’al rei
42. ni a comte tan ni quant,
43. c’asatz fauc meils mon talant
44. quan l’ai despoillada
45. sotz cortin’obrada.

VI.

46. En autr’amistat propdana
47. m’amor mis, que·m fo dolsana:
48. ans la·m nei
49. que·m sordei,
50. mas la meiller no·m vairei.
51. L’esparviers, ab bel semblant,
52. va del Pueg ves leis volant:
53. la longua trencada,
54. pren lai sa volada.

VII.

55. En breu m’es com fils de lana
56. lo fortz fres e la capsana,
57. qui que·s grei,
58. so·us autrei,
59. tota·l rengua e·l correi.
60. C’aisi vauc entrebescant
61. los motz e·l so afinant:
62. lengu’entrebescada
63. es en la baizada.