I.

1. D’entier vers far ieu non pes
2. ni ges de fragz no·n faria
3. e si fatz vers tota via,
4. en l’an un o dos o tres,
5. et on plus sion asses,
6. entier ni frag no so mia.

II.

7. Aisso non creyrey ieu ges
8. que lunhs vers de leujairia,
9. don creys peccatz e follia,
10. per dreg nom entier agues
11. .  .  .  .  .  .  .  .  .  .  .  .
12. qu’entier denant non faria.

III.

13. E so quez entier non es
14. ni anc no fo, cum poiria?
15. Fols hom leu so cujaria
16. que chans nulhs entrebesques
17. qu’om de vanetat fezes:
18. entiers ni fragz non seria.

IV.

19. Foudat fai e nescies
20. qui vers fai de truandia,
21. pessan qu’entiers ni fragz sia:
22. que chanso ni sirventes
23. n’estribot ni arlotes
24. non es, mas quan licharia.

V.

25. Selh qui faulas di – faul’es
26. enteiramen lecharia
27. si qu’om no c’enganaria –
28. qu’entiers e sals remazes
29. non pot, que sa falsa fes
30. lo ten fat en s’aurania.

VI.

31. E quan canorgues si mes
32. Pey d’Alvernh’en canongia,
33. a Dieu per que·s prometia
34. entiers que pueys si fraysses?
35. Quar si feys fols joglar es
36. per que l’entier pretz cambia.

VII.

37. E cujas qu’a Dieu non pes
38. chans d’aital ufanaria,
39. e doncx quo mals li plairia?
40. Mas no·l play, que, si·l plagues,
41. tant auria·l mals conques
42. qu’ab ben egal partiria.

VIII.

43. Si peccatz era merces,
44. messonja vertatz parria,
45. e qui en sa joglaria
46. ment, e mentir non es bes,
47. donc es mals, e non es res
48. mas despieigz e vilania.

IX.

49. Fols vanars es pagezes
50. e grans laus es pagezia
51. e fols mentirs es bauzia
52. et hom de dit ufanes
53. es plus vilas que pages,
54. segon romans e clercia.

X.

55. E selh no par ges cortes
56. qui·s lauza ni·s glorifia,
57. quar eys Dieus nos anuncia:
58. «Qui trop s’yssaussa, mens es
59. bayssan, e selh levatz es
60. qui segon so s’umilia».

XI.

61. So dis qu’om si conogues,
62. e qui aisso gardaria
63. ja no·s sobrelauzaria,
64. que sobrelaus follesc es
65. e pareys be, si pros es,
66. ja el mezeis non o dia.

XII.

67. Pro sap e ben es apres
68. qui so fay que ben estia,
69. et es mager cortezia
70. que sos laus es pels paes
71. per autruy que per el mes,
72. qu’ab pobol par vilania.

XIII.

73. De far sos novelhs e fres
74. so es bella maestria
75. e qui belhs motz lassa e lia
76. de belh art s’es entremes;
77. mas non cove q’us disses
78. que de totz n’a senhoria.

XIV.

79. En pauc d’or’es hom mespres
80. quan ditz mais que non deuria.