I.

1. So qe·m sol    dar alegranssa
2. mi fai soven    sospirar,
3. mas per la bon’esperanssa
4. q’ieu ai en so q’es a far    vuoill chantar,
5. car    ges no·m teing per pagatz
6. del segle que n’es passatz,
7. ni aquest no·m platz,    car las poestatz
8. van    baissan    joi e solatz    e valor merman.

II.

9. Jos el sol    a gran mermanssa
10. don dei joven    encolpar,
11. an mes joi pretz et honranssa
12. cort e don e dompneiar,    e d’amar
13. par    que s’es chascus laissatz
14. - don naissia larguetatz -
15. per q’ieu sui iratz,    mas s’ieu fos amatz
16. tan    ni qan    be·m viratz    de plus gai semblan.

III.

17. C’Amors    vol gaia semblanssa,
18. mas ieu faillen    razon ar
19. lieis q’es tornada en viltanssa,
20. c’om no la pot gazaignar    ses comprar.
21. Car    vendutz es lo mercatz
22. don chascus es enganatz,
23. pero ben sapchatz    q’ie·n sofrira en patz
24. gran    affan,    totz forsatz,    si·l fos benestan.

IV.

25. Cel qe·is dol    de benestanssa
26. deu doblamen    mal trobar:
27. si·s fatz, q’ieu vei la balanssa
28. de ricor soven levar    e baissar.
29. Gar    -dar deu totz hom senatz,
30. qand es valens e prezatz,
31. que no·l prenda latz,    c’hom s’en vai viatz
32. d’an    en an,    per qu’es fatz    qui·l ben vai tarzan.

V.

33. Rossinhol,    vai ses tarzanssa
34. l’emperador gen    pregar
35. qe·m get’oimais de fianssa,
36. car trop lo vei demorar    outra·l Far:
37. par    non a ni no fo natz,
38. pero el s’es ben lauzatz
39. mal grat dels malvatz    cui vei desfrenatz,
40. tan    qu’auran    lo percatz    que deservit an.

VI.

41. Dar    vuoill ma chansson, s’il platz
42. a Na Ponssa part Duratz,
43. car jois e solatz    e totas bontatz
44. van    doblan    e beutatz    el sieu cors prezan.

VII.

45. Mar    -ques, si cor no compratz
46. tart reignara Monferratz,
47. e si vos tarzatz,    cil cui plus amatz
48. gan    -diran ves totz latz,    que no vos segran.