I.

1. Per Dieu, Amors, ben sabetz veramen
2. c’on plus deisen plus poja Humilitatz
3. et Orgoills chai on plus aut es pojatz;
4. don dei aver gauch e vos espaven
5. qu’ancse·m mostres orgoill contra mesura
6. e brau respos a mas humils chansos:
7. per qu’es semblanz que l’Orgoills chaia jos,
8. c’apres bel jorn ai vist far nueg escura.

II.

9. Mas vos no par poscatz far faillimen;
10. pero, can faill cel qu’es pros ni prezatz,
11. tan com val mais tan n’es plus encolpatz,
12. qu’en la valor poja·l colpa e deisen;
13. e quant hom tot perdona·l forfaitura
14. ja del blasme no·ill sera fatz perdos,
15. c’aicel reman en mala sospeisos
16. qu’a manz met cel qui vas un desmesura.

III.

17. Blasme n’a hom, e chascus cela s’en,
18. per que n’es plus en l’engan galiatz
19. aicel que·l fai c’aisel qu’es enganatz;
20. e vos, Amors, per que·l fatz tan soven
21. c’on plus vos serv chascus plus s’en rancura?
22. E de servir taing qualque guiardos,
23. pretz o amics, meilluramenz o dos:
24. menz d’un d’aquestz par fols qui s’i atura.

IV.

25. Ben fui eu fols, que·i mis lo cor e·l sen:
26. senz no fo ges, enans fo granz foudatz,
27. car sel es fols qui cuj’esser senatz
28. e sap hom menz ades on plus apren;
29. e, pois Merces que val mais que Dreitura
30. non valc a mi ni ac poder en vos,
31. pauc mi sembla m’agues valgut Rasos;
32. per qu’eu fui fols car anc de vos ac cura.

V.

33. Mas ar sui rics, car en vos no m’enten,
34. qu’en cujar es riquesa e paubertatz,
35. car sel es rics qui s’en ten per pagatz
36. e sel paubres qu’en trop ricor enten;
37. per qu’eu sui rics: tan grans jois m’asegura
38. quan pes qu’eu sui tornatz desamoros,
39. c’adoncs era marritz, ar sui joios;
40. per qu’eu m’o tenc a gran bonaventura.

VI.

41. Cortesia non es als mas mesura,
42. mas vos, Amors, non saubes anc que·s fos;
43. per qu’eu serai tan plus cortes de vos
44. c’al major briu calarai ma rancura.

VII.

45. A N’Aziman et a·N Totztemps t’atura,
46. chansos, car lor es e de lor rasos,
47. c’aitressi s’es cascus pauc amoros,
48. mais semblan fan de so don non an cura.