I.

1. L’autrier trobei tras un fogier
2. un broill, on era us efas mes
3. en un rolet ab dos conres
4. e la noirissa: un gat nier.
5. Aquest ostals fon d’un parier,
6. Comunal, qui veich dechazer;
7. e qant lui vi, cuidei vezer
8. Ruqet, un viel joglar lanier.

II.

9. Cel, s’es paubres, mal no m’en mier,
10. q’ieu no·ill tulc ren mas las pares
11. e·l moli don rendia ses
12. al paire d’en Ponson Gaifier;
13. qe·n dis un tal enuich l’autrier,
14. don men, qe no·m dis point de ver;
15. mas no·s po de mal dir tener:
16. a·n vos los majors colps q’el fier!

III.

17. Eu no m’apel ges Olivier
18. ni Rothlan, qe q’el se·n dises,
19. mas valer lor cre maintas ves
20. quant cossir de leis q’eu enquier;
21. e non sai el mon cavalier
22. q’eu adoncs no·l crezes valer;
23. e volria tal fieu aver
24. a partir regisme o enpier.