I.

1. Amics Symon, si·us platz, vostra semblanza
2. voil qe·m digatz d’aqetz dos partimenz:
3. dos cavalliers sai qui d’un’egalanza
4. fan messios honradas e plazentz.
5. L’us es tan larcs q’al [cor] n’a alegranza
6. ni·l coston re, q’aitals es sos talenz;
7. l’autr’a son cor escars qe n’a pezanza,
8. mas per talan, q’a domnei, son cor ventz.
9. A cui deu hom mais grazir tal honranza?

II.

10. Segne’n Lafranc, ieu hai drecha balanza
11. e sai triar entre los conoissenz;
12. per q’ieu vos dic, e·us sui bona fermanza,
13. q’eu non seria per cobeitat valentz;
14. qe se dones e mezes tota Franza
15. iradamen, non for’entre las gentz
16. grazitz; mas sel deu hom dir qe sobranza
17. qi de bon cor sai [far bos] faitz plazenz:
18. e cel n’a grat e mi platz s’amistanza.

III.

19. Amics Symon, non es granz maestria,
20. se·l larcs sap far honradas messios,
21. qe sos talantz e sos cors lieu fan via:
22. non es doncs sols, anz i ha compagnos.
23. Mai d’esforz fai cel qe son cor desvia
24. e sos talantz li n’es contrarios
25. et es los venz ambdos e a d’els bailia;
26. doncs qar el es d’onor plus deziros,
27. mal estera s’om plus non lo grazia.

IV.

28. Segne’n Lafranc, qi q’o voilha, so dia.
29. De nul amant es plus grazitz oc dos
30. e l’honramentz qi nais de cortezia
31. q’aicel de cor destreg e consiros;
32. qe s’om destregz n’escars fai galaubia,
33. esfortz fai gran, mas non es gracios,
34. quar non li ven de francha galliardia;
35. e pois no·l fai alegre ni ioios,
36. el pert lo don e·l grat e qan qe sia.

V.

37. L’onrars del larc, Symon, qais d’aventura
38. ven ses pechat, per q’om no·l deu prezar
39. tant qom l’autre qi nais d’avinen cura,
40. malgrat del cor: don fai plus a lauzar.
41. E si el cor se·n dol, non es rancura
42. ni laitz semblantz, tant ges sab ioi menar;
43. per q’om lo deu grazir mas de mezura,
44. qar qi mais fa d’esfortz per ben istar
45. mais deu aver de grat, segon drechura.

VI.

46. Segne’n Lafranc, chascus hom per natura
47. es pars d’autrui; mas aqel qe sap far
48. mais de plazers de bon cor plus meillura
49. et aqel deu sobre·ls autres puiar.
50. Doncs es garnitz de meillor vestidura
51. cel q’a lo cor e·l talant en donar
52. et en servir; per q’ieu vei qe peiura
53. vostra razos, si·m voletz contrastar,
54. si ben sabetz mai qe me d’escrichura.

VII.

55. Amics Symon, ieu ai ferma creenza,
56. s’om es temptatz de grieu temptacion
57. et el a tant de valor qe la venza,
58. q’en deu aver plus honrat guizardon
59. de cel qi serf ses trabail e ses tenza.
60. Doncs cel qi ventz son avol cor fellon
61. e fai, malgrat del cor, faigz de plazenza,
62. qar don’e met e ventz tal campion,
63. mer mais de grat, segon ma conoissenza.

VIII.

64. Segne’n Lafranc, ben granz desconoissenza
65. fora e mi, se d’aquesta tenzon
66. vos clames qit, pos vos aug dir faillenza,
67. per q’ieu voil plus afortir ma razon:
68. qe se l’om serf de cor, a ma parvenza,
69. cel qi lo fai contra son corazon
70. non es sos pars, si tot vol far valenza;
71. qe sivals tant deu hom mais prezar don,
72. qant es plus datz franchamen ses contenza.

IX.

73. A’n Jacme Gril, en cui es conoissenza,
74. amics Symon, trametam la tenzon,
75. q’en cobleian en don drecha sentenza.

X.

76. Segne’n Lafranc, ben ai ferma crezenza
77. qe sera ben iutiada per razon
78. per lui, qar sap zo q’a fin pretz agenza.