I.

1. Segne’n Lafranc, tant m’a sobrat amors
2. q’ieu non conosc lo mal dal be q’ieu n’ai;
3. car lo maltraigz m’es tan douza sabors,
4. qe·l gaugz ni·l bes no·m ten pro quant ieu l’ai:
5. per q’ieu conosc q’a murir m’er, zo sai,
6. ni no·m partrai, tant son fizels amaire,
7. qar cil qi m’a del tot el sieu poder
8. mi mostr’orgueil e fai non da dever,
9. mas trop me fai pero dol e mal traire.

II.

10. Amics Symon, celui sobra follors
11. qi apella maltraig zo que li plai,
12. e qi non cern los gaugz de las dolors;
13. non sai per qe·il venguesson d’amor iai.
14. Car non grazis lo ben cui non desplai
15. lo mals, e qi d’aisso non es triaire,
16. ia no·il deu far domna d’amor plazer,
17. pos non conois lo gaug dal desplazer:
18. no·l dic per vos, car no·us voil irat faire.

III.

19. Segne’n Lafranc, ben cuidava de vos
20. conseil trobar, mas ia mais no·l qerrai
21. q’enemics es de totz los amoros
22. et anc no·us plac azautamentz de lai
23. don movon tuig bon faig cortes e gai;
24. car si fosses d’amor pres pauc ni gaire,
25. ia de triar non agratz tal poder
26. qom mi dissetz; mas qar a non chaler
27. avetz gitat amor, no m’es confraire.

IV.

28. Amics Simon, totz los amanz ioios
29. hai eu amatz totz temps e amarai
30. e sui dels lur faillimenz doloros.
31. E per aizo vos dic zo qe·us desplai,
32. qar diziatz zo q’a dir non s’eschai:
33. don corrossat vos vei al mieu veiaire.
34. Mas una ren vos voil ieu far saber,
35. si·m voliatz d’amor conseil qerer:
36. se·us volgues mal, si·us for’ieu conseillaire?

V.

37. Segne’n Lafranc, non sui ges corrossos
38. pels vostres digz, mas quar ab cor verai
39. amei tos temps mal grat dels enoios
40. e sui amatz et am et amarai.
41. Feunei qar vei, si tot amors m’atrai
42. gaug e plazers e·m ten el sieu repaire,
43. q’ieu muer; e·us dic q’ieu non puesc ben aver
44. s’eu non remir mi donz matin e ser,
45. e s’ieu follei, ben lo puesc ieu retraire.

VI.

46. Ja non degratz esser tan cossiros,
47. pos fin’amors tant grant honor vos fai,
48. qe ben amatz es mal grat dels gelos.
49. Amics Symon, e qe demandatz mai?
50. Mas ieu sai ben per ver e si·l dirai
51. car vos l’amatz et ill vos ses cor vaire
52. e non podetz soven aver lezer
53. del sieu bel cors embrassar e tener;
54. donc, si·us doletz, no me·n meravil gaire.

VII.

55. Segne’n Lafranc, ieu viu en bon esper,
56. car hai chauzit del mon la debonaire.

VIII.

57. Amics Symon, penzatz de·l retener,
58. que pron avetz conqist, al mieu veiaire.