I.

1. Deus, vera vida, verays
2. e dreitz endrech clers e lays,
3. e nomnatz salvaire Cristz
4. en lati e sobr’ebrays,
5. e natz e pueys mortz vius vistz,
6. e sorses, don laisses tristz
7. aquels que pueys fezes iauzens.

II.

8. Senher reis, ieu falhi fals,
9. don es yssitz tan grans mals,
10. en cossirs, digz et endurs
11. et en fols faitz infernals,
12. ab brondills d’estranhs aturs,
13. et en tals talans tafurs:
14. mi·us ren colpables, penedens

III.

15. de tot so qu’ieu fezi anc,
16. e si non ai cor ferm franc
17. de dir so que m’agra ops,
18. vos prec, precs a cuy m’en planc,
19. per cui tan fon fizels Iops,
20. que non gardetz mos tortz trops,
21. mas gracia·m sia sufrens.

IV.

22. Qu’ieu no·m sen si savis sai
23. que puesca conquerre lay
24. lo regn’on hom set ni fam
25. ni freg non a ni esmay,
26. si·l vostra vertutz cuy clam
27. no·m don’esfortz qu’ieu dezam
28. los ioys d’aquest segle giquens,

V.

29. que·m fan falhir ves vos sol,
30. per que·l cors m’intra en tremol;
31. e si·m servatz mos forfaitz
32. tro lai al derrier tribol,
33. qu’enans, no·ls m’aiatz, far fraitz,
34. senher, ges bos no·m n’es plaitz,
35. si merces no·ls sobrevens (–1)

VI.

36. de vos qu’estorses Sidrac,
37. darden la flama e Misac
38. essems et Abdenago,
39. e Daniel dins del lac
40. e Ionas ab utero
41. e·ls tres reis contra Hero
42. e Suzana entre·ls fals guirens;

VII.

43. e pagues, senher sobrans,
44. tans de dos peys e cinc pans,
45. e·l Lazer suscites vos
46. qu’era ia quatriduans;
47. de vos ac per bel respos
48. son serf salv centurios,
49. e gites del mon mains turmens.

VIII.

50. E fezes de l’aigua vi
51. al covit archetricli
52. e d’autres meravills moutz,
53. don hom carnals no sap fi,
54. ni no·us en mostres estoutz;
55. e parlet per vos lo voutz
56. de Luca, rics reis resplandens.

IX.

57. E fezes la terra e·l tro
58. e tot quant es ni anc fo,
59. d’un sol seing e·l sol e·l cel
60. e cofondes farao;
61. des als filhs d’Israel
62. lach e bresca, manna e mel
63. e dampnes per serpen serpens,

X.

64. c’als vostres fon requies
65. quan vos plac que Moyzes
66. encausses lai el dezert;
67. e solses las mas e·ls pes,
68. quand us angels l’ac espert,
69. sanh Peire e·l fezes cert
70. dels vostres destrics destreignens;

XI.

71. e·us queziron la lur plebs
72. tro lai on es mons Orebs,
73. aucien dins Bethleem:
74. qan vos en fugi Iozeps
75. en Egipte, so sabem,
76. e pueys en Iheruzalem,
77. vengues entre·ls vostres parens

XII.

78. a Nazare, reys Ihesus.
79. Pair, en tres personas us,
80. e Filhs e Sanhs Esperitz
81. ad or e trinitatz sus,
82. qu’es sims e rams e razitz
83. e Dieus e de quant qu’es guitz,
84. siatz me, si·us platz, defendens.

XIII.

85. E sai obra e bon talan
86. mi des a far entretan,
87. que quan venretz en las nius
88. iutjar lo segl’el iorn gran,
89. doutz dieus, no·m siatz esquius,
90. e qu’ieu, clars reys regum pius,
91. m’en an ab los iauzitz iauzens.

XIV.

92. E, Senher, no m’oblidetz gens,

XV.

93. e ses vos no suy sostenens,

XVI.

94. e senh m’en vostre nom crezens:

In nomine Patris et Filii et Spiritus sancti, amens.