I.

1. Si paradis et enfernz son aital,
2. amics Girard, qon tot ior auzem dir,
3. in qal d’ams dos volez mais, ses iauzir
4. ni ses dolor, per un mes prendre ostal
5. per aprendre d’infern la pena greu:
6. en paradis, qon fan l’amic de Deu,
7. o inz infern, si qon hom sai apren
8. autres affars, demandan e vezen?

II.

9. Aycard, eu prenc lo soiorn que mais val,
10. q’en paradis voill aprendre e chausir
11. lo ben qe·i pren chascus per Dieu servir
12. e las ricors de la ioia eternal
13. e qon hom serf de paradis lo feu,
14. e qal Dieus ten pres de lui plus per seu,
15. q’aisi poirai paradis veramen
16. leu conquerer, s’ieu non faill eissien.

III.

17. Girard, mais voill a mon pro vezer mal
18. q’a mon dan ben; per q’en enfern desir
19. vezer lo mal q’hom i pren per faillir
20. e las dolors de la pena enfernal,
21. e qal pena an Sarrazin e Judeu
22. e paubre e ric; q’aisi sabrai pois leu
23. fugir infern e servir ben e gen
24. lo ioi maior q’hom conqer Dieu serven.

IV.

25. Servisi fagh per paor son venal,
26. Aycard, per qe no fan gaire a grazir,
27. q’ieu non vei un gen far ni ben merir;
28. mais s’ieu serf Dieu per sol’amor coral,
29. conqier son grat d’aqel servir e·l meu;
30. e qar trastugh e latin et ebreu
31. fol e senat van infern maldizen,
32. voill vezer zo don chascus a talen.

V.

33. Girard, dur es zo qe mou d’altretal;
34. don, s’infern vei, pro n’aurai eu qe·n mir
35. d’esqivar mal; qar plus dopta morir
36. qi va sa mort q’aicel q’es en loc sal;
37. e s’aisi es qon aug legir el breu
38. o qon vei peingh e escrigh a la pleu,
39. greu pot nuls iois dar tan d’esbaudimen
40. qon dona infernz, qi·l mira, d’espaven.

VI.

41. Aycard, s’en loc paubre trist e mortal,
42. on chascus perd, vos cuiaz enriqir,
43. be·m deu l’ostals precios abelir,
44. on ha toz temps festa pasca e nadal;
45. qe greu trai hom foc de glaz ni de neu
46. ni ris de plor ni de mal ben, per q’eu
47. voil Dieu vezer e sa cort e sa gen,
48. e vos veiaz d’infern lo marrimen.

VII.

49. Amics Girard, tan vos respon in breu:
50. q’anc hom non vic la gran ricor de Deu,
51. ni paradis no servic ben ni gen,
52. s’enans non hac d’infern dopta e ’spaven.

VIII.

53. Tals dopta infern qe non serf gaire a Deu,
54. amics Aycard, mais d’aizo non dopt’eu,
55. q’hom in infern posca aprendre tan gen
56. servir a Dieu, qon qi·l ve de presen.