I.

1. Pessius, pessans, peccans e penedens
2. planc en ploran; preian planc mos peccatz
3. don anc falhi en cutz ni en pessatz,
4. ni en folhs digz ni en faigz decebens;
5. e quar suy fortz e forfaitz follamens
6. clam merceyan merce, merceyamens
7. a Selh que es unitz et unitatz
8. e trinables e tres en trinitatz:
9. qu’Elh me perdo, qu’es perdonans perdos,
10. com perdonet als perjurs perilhos.

II.

11. Qu’Elh es leos et homs complidamens,
12. aygla-vedelhs doblamens figuratz,
13. e bos espers e fes e veritatz,
14. fis senes fin e vers comensamens,
15. e portz salvan ab complitz guerimens,
16. e doussa fons bayssan totz mals talens,
17. caps de totz bes, merces e caritatz,
18. e joys entiers e franc’umilitatz,
19. e pas pleniers que del cel venc sa jos
20. per desliurar los greus mals enguoyssos.

III.

21. Et es fis rays sobre totz resplandens,
22. donc anc nulh temps no·s mermet sa clartatz,
23. e dous anhels per cuy fon restauratz
24. de tot lo mon lo sobriers perdemens;
25. qu’ins en infern avian intramens
26. los bos e·ls mals ses totz retenemens,
27. tro Elh nasquet e fo marturiatz,
28. don l’aunitz locx remas espoliatz,
29. e lay laysset los mals e pres los bos
30. qu’al sant pujar triet per companhos.

IV.

31. Et es vida, guitz e consolamens,
32. pastres e lutz e primiers engenratz,
33. e dregz camis, peira e fermetatz,
34. e de totz bes totz entiers complimens,
35. e sans espos ses nulh corrumpemens,
36. e mayestres de totz melhuyramens,
37. e clars solelhs per cuy es aut pujatz
38. lo menre bes e·l mager mals bayssatz,
39. vertutz e bras misericordios,
40. e nonmortals e sans e poderos.