I.

1. Farai un vers ab son novelh
2. e vuelh m’en a totz querelar,
3. qu’a penas trobi qui m’apelh
4. ni sol mi denhe l’uelh virar:
5. trobat m’an nesci e fadelh
6. quar no sai aver ajustar.

II.

7. Un non vey tan ric ni tan belh
8. no·s camge de tot son afar
9. quan trop joves pert son capdelh
10. per cui deuria melhurar,
11. que plus lo plumon qu’un auzelh
12. quan lo vezon tot sol estar.

III.

13. No·m puesc mudar que no·m querelh
14. que la folhia vey sobrar;
15. non truep qui ab si m’aparelh
16. ni·m fassa ben ni·m vuell’amar,
17. ni de nulha ren m’acosselh
18. ni m’essenh quon o deya far.

IV.

19. Si duerm trop, non er qui·m revelh,
20. ans si penran tug a gabar
21. e si stau tot jorn al solelh,
22. pauc trobarai m’an covidar:
23. ja negus hom d’amic nou velh
24. si non a poder de donar.

V.

25. Greu er nulhs hom aperceubutz
26. qui non a mas se a mandar:
27. si·s savis, er per folh tengutz
28. si·n aver no·l ve hom pojar.
29. A tot despieg es cazegutz
30. cuy ave autruy agachar.

VI.

31. Ja non er pros ni mantengutz
32. qui non sap aver amassar,
33. quar non es dregz reconogutz
34. mais fors’a qui mais pot pennar,
35. e·l paupres es ses colp vencutz
36. que no·s pot cubrir ni tornar.

VII.

37. Cuy siey amic falhon del tot
38. ben seri’ops a perforsar
39. que non estes tostemps el lot
40. ans vis si poiria levar,
41. que per fraire ni per nebot
42. no·s deu negus hom refizar.

VIII.

43. Mas so que hom a, sobretot
44. cove per mezura menar,
45. si non o fai es senes cot:
46. l’autruy l’ave segr’e cassar.
47. Ab so qu’ieu sembli be la cot
48. que non talh’e fa·l fer talhar.

IX.

49. Aquo de qu’ieu non say un mot
50. cugi ad autruy ensenhar.