I.

1. Eras, quan plou et iverna
2. e fresca aura e buerna
3. s’atrai e chai e despuelha la verna,
4. fas sirventes per esquerna
5. d’amor, qu’enaissi s’enferna
6. que las joves an levad’a taverna.
7. Tant an apres de falterna
8. que lur cons vendon a terna:
9. plus son arden non es lums en lanterna.
10. Domnas tozas,   sofrachozas,   la vera paterna
11. vos cofonda,   e·us rebonda   selh que·l mon governa!
12. Qu’en Jausbertz   non es tan certz,   per los sanhs de Palerna,
13. qu’el pantais   del pel no·i lais,   si sec la vostr’esterna.

II.

24. Audebert, si de ma scola
25. issetz, pareis causa fola.
26. Si las crezetz, no·us tenra pro mola;
27. qu’ieu fui ja de lur corola
28. e sai cum quascuna dola:
29. mais volon raubar qu’Aspes que degola.
30. Ges raca pieitz non asola
31. qu’elhas fan, s’om lor acola.
32. Neis en mostier no·n pot gandir estola!
33. Qui·n joventa   met s’ententa   no sap qu’es virola:
34. mas en guerra   met sa terra   selh que las percola.
35. Tan son leas   lur galeas   que lais ni viola
36. no lur auta,   mens de rauta,   don quascuna tola.

III.

37. Jovens torn’en «no m’en calha»
38. et amors en cominalha,
39. mas las joves en trazon lur vitalha;
40. mas per nient se trebalha
41. mos Audebertz que lur valha,
42. quar desse l’auran mes tot en la palha.
43. E par ben que sens li falha
44. qui donas joves engalha
45. ab las vielhas, que an pretz ses baralha
46. quar gent gabon   e pueis sabon   far per qu’om mais valha:
47. bona pauza   e ses nauza   e rica gazalha.
48. Mas tozeta,   que·l prometa,   no·n perdra mezalha,
49. anz assaia   cum dechaia   son drut en nualha.

IV.

50. Ben a de sen gran nescieira
51. drutz que dona joven quieira,
52. que·l plus manen fai tornar en paubrieira;
53. mas selhas de mieja tieira
54. deu hom ponhar cum conquieira
55. lur amistat, quar an proez’entieira.
56. Quon plus es de jorns plenieira
57. val mais en tota manieira.
58. Quar no desiron ges mercat ni fieira,
59. lur companha   es gazanha.   Enanz qu’om so mieira,
60. bon’alberga   qui que·s perga,   fara voluntieira.
61. Aital osta   meins de costa,   vuelh mais que no·m quieira:
62. melhs mi colga   e m’afolga   que joves guerrieira.

V.

63. Er no sai cum me captenha:
64. si·m lais d’amar o m’en fenha;
65. d’estz dos afars m’es ops que·l melhor prenha.
66. Amors, e mals glais vos senha
67. e selh qu’en vostra cort renha!
68. Quar non etz tals que midons s’en destrenha?
69. Chaitius sui qu’elha no·m denha
70. amar, per que sieus devenha;
71. e si·m destrenh plus que fuecx no fai lenha.
72. Men sui savis   que gramavis   qui la gent essenha,
73. qu’ai tal anta   per garanta   que no s’endevenha.
74. Dieus mi noga,   si no·m loga   joves e no·m senha,
75. si tal nova   non cug mova,   don ja bes no·l venha.