I.

1. Guillem de Mur, un enujos [Enric]
2. novel partiment vos vuell far.
3. Cal amas mais: tostems estar
4. que sias tan formentz gilos
5. qu’en perdas joy e bel captenement,
6. ho que sia giloza tan forment
7. vostra moilher de vos, que·n planc e·n plor,
8. e non ges vos? No·n prendas la pijor!

II.

9. Seinher, sel que fai d’un dan dos [Guillem]
10. non fai ben ni gent son afar,
11. per qu’ieu vuell un dan esquivar
12. e vuell esser so sospichos,
13. que·l gilos vei hom es a tort sovent.
14. E s’ill era giloza, for’entent
15. que·n fezes tant quez acsem dezonor
16. amduy ensems, que·n mescles m’al follor.

III.

17. Dieus e dretz . . . e razos [Enric]
18. s’acordan c’om deu mais amar
19. si mezeis c’autre, per que·m par
20. que pegua es vostra tensos,
21. car vos sabes – e trobas ho legent –
22. que fort gilos es fora de son sent.
23. Trop en portas a la moiller d’amor,
24. que l’ames mais que vos ex ni honor.

IV.

25. Si ben m’est trop contrarios [Guillem]
26. ni sabes pron de predicar,
27. non comandet Dieus c’am sa par
28. deu esser tot un a l’espos?
29. Aisi com sell que son castell defent
30. deves la part hon plus ha d’espavent,
31. deu hom guardar la freoleza lor;
32. cant pros domna faill no·n tornem color!