I.

1. Pos entremes me suy de far chansos
2. ben dey guardar que fals motz no·y entenda,
3. e, s’ieu dic re que midons en grat prenda,
4. be m’en sera rendutz bos guazardos.
5. Et er gran tort si mos chans non es bos;
6. per que? quar ylh m’a donat l’art e·l genh
7. e so qu’ieu fatz non dei metre en desdenh.

II.

8. E sitot m’es de semblant orgulhos
9. non ai poder que ves autra m’atenda,
10. qu’el cor e·il huel me mostron que·il me renda
11. tan m’agradi de sas bellas faissos;
12. e quan m’en cug partir, no m’es nulhs pros,
13. que s’amors es denan mi qui m’atenh,
14. que·m fai tornar vas lieys, tan mi destrenh.

III.

15. Luenh m’es dels huelhs mas del cor m’es tan pres
16. selha per cui soven planc e sospire
17. que, on plus n’ai d’afan e de martire,
18. dobla l’amors e nays e creys ades;
19. e quar suy sieus no cug que m’enguanes,
20. e fi me tant el sieu ensenhamen
21. per qu’ai respeyt que n’aura chauzimen.

IV.

22. Ben fera sens si de lieys me lunhes
23. ans que·m laisses a la dolor aucire,
24. mas Amors vol qu’ieu sia francs suffrire
25. e ja per ren no n’aia·l cor engres;
26. anc Dieus no fetz nulh hom qui ben ames
27. que non crezes mais Amor que son sen,
28. per que m’aven a far son mandamen.

V.

29. Anc nuls amans per sidons no sufri
30. tan gran dolor ni tan gran malanansa;
31. per merce·l prec que·m digu’a tal pessansa
32. si·l cor non a que·s melhur enves mi,
33. per que vengues plus viatz a la fi,
34. qu’assatz val mais morir, al mieu semblan,
35. que totztemps viur’ab pena ez ab afan.

VI.

36. Chansoneta, vai t’en tot dreyt cami
37. lay a midons en cuy ai m’esperansa
38. e diguas li qu’aya qualque membransa
39. de me quar l’am ses enjan ab cor fi,
40. qu’anc per ma fe des l’ora qu’ieu la vi,
41. non ai mudat ni camjat mon talan,
42. ans l’am ades e la dupt e la blan.

VII.

43. [Seingn’en [H]eral[h] de Polinac, montan
44. vai vostre prez a chascun jor de l’an.]

VIII.

45. [Bella-Guarda, de vos dauri mon chan
46. quar negus hom non pot mentir lausan.]