I.

1. Vers Dieus, e·l vostre nom e de sancta Maria
2. m’esvelharai hueimais, pus l’estela del dia
3. ven daus Jerusalem que m’ensenha qu’ieu dia:
4. estatz sua e levatz,
5. senhor, que Dieu amatz!
6. que·l jorns es aprosmatz
7. e la nuech ten sa via;
8. e sia·n Dieus lauzatz
9. per nos et adoratz,
10. e·l preguem que·ns don patz
11. a tota nostra via.

II.

12. La nuech vai e·l jorns ve
13. ab clar cel e sere,
14. e l’alba no·s rete
15. ans ven belh’e complia.

III.

16. Senher Dieus que nasques de la Verge Maria 
17. per nos guerir de mort e per restaurar via,
18. e per destruir’enfern que·l diables tenia
19. e fos en crotz levatz
20. d’espinas coronatz
21. e de fel abeuratz,
22. Senher, merce vos cria
23. aquest pobles onratz:
24. que·lh vostra pietatz
25. lor perdon lor peccatz.
26. Amen, Dieus, aissi sia.

IV.

27. La nuech vai e·l jorns ve
28. ab clar cel e sere,
29. e l’alba no·s rete
30. ans ven bel’e complia.

V.

31. Qui no sap Dieu pregar obs es que o aprenda
32. et auja qu’ieu dirai et escout et entenda:
33. Dieus, que comensamens es de fota fazenda,
34. laus vos ren e merce
35. [. . .] e del be
36. que m’avetz fach ancse;
37. e prec, Senher, que·us prenda
38. grans pietatz de me
39. que no·m truep ni·m malme
40. ni m’engane de re
41. diables ni·m surprenda.

VI.

42. La nuech vai e·l jorns ve
43. ab clar cel e sere
44. e l’alba no·s rete
45. ans von bel’e complia.

VII.

46. Dieus, donatz mi saber e sen ab qu’ieu aprenda
47. vostres sanhs mandamens e·l auja e·l entenda,
48. e·l vostra pietatz que·m gueris que·m defenda
49. d’aquest segle terre
50. que no·m trabuc ab se;
51. quar ie·us ador e·us cre,
52. Senher, e·us fauc ufrenda
53. de me e de ma fe,
54. qu’aissi·s tanh e·s cove;
55. per so vos crit merce
56. e de mos tortz esmenda.

VIII.

57. La nuech vai e·l jorna ve
58. ab clar cel e sere
59. e l’alba no·s rete
60. ans von bel’e complia.

IX.

61. Aquel glorios Dieus que son cors det a venda 
62. per totz nos a salvar prec qu’entre nos estenda
63. lo sieu Sant Esperit que de mal nos defenda
64. e d’aitan nos estre
65. josta los sieus nos me
66. lai sus, on si capte
67. e·ns meta dins sa tenda.

X.

68. La nuech vai e·l jorns ve
69. ab clar cel e sere
70. e l’alba no·s rete
71. ans ven bel’e complia.