I.

1. Chantars mi torn’ad afan
2. quan mi soven d’En Barral,
3. e pos d’amor plus no·m cal,
4. no sai com ni de que chan;
5. mas quex demanda chanso
6. e no·lh cal de la razo:
7. qu’atressi m’es ops la fassa
8. de nou, quom los motz e·l so;
9. e pos forsatz, ses amor,
10. chan per deut’e de follor,
11. pro er mos chans cabalos
12. si non es avols ni bos.

II.

13. Amador son d’un semblan
14. e·l ric cobe d’atretal,
15. qu’ades ab dolor coral
16. mermon lor joi on plus n’an,
17. qu’en luec de fenestra so
18. que merma s’om i apo;
19. q’on plus pren quex so que cassa
20. plus a del segr’ochaiso;
21. per qu’ieu tenh sel per melhor
22. que rey ni emperador
23. qui cels mals aips vens amdos
24. que venso·l plus dels baros.

III.

25. Bon fora s’om prezes tan
26. Dieu com si ni ben com mal!
27. mas so prez’om que no val
28. e son pro ten hom a dan;
29. per qu’ieu no·us aus vostre pro
30. dir chantan, que no sab bo
31. al segle ni cre que·l plassa
32. qui·l di ren si so mal no;
33. mas pero la desonor
34. puosc dir, si·l Turc entre lor
35. son vencut ni baissat jos,
36. pos tut vencut venson nos.

IV.

37. Be·ns venson pos nuilh deman
38. non fam de l’anta mortal;
39. e si nos fossem leyal
40. tornera·ns ad honor gran;
41. qu’us cortes gienhs de Dieu fo
42. que·lh ric trobesson perdo –
43. qui·s fan plus frevol de glassa
44. qui d’estenensa·ls somo –
45. mas combatten ab lauzor:
46. n’a Dieus pres en son labor
47. mains que ja confessios
48. no·il plagra s’aquo no fos.

V.

49. Doncx, nostre baro que fan
50. ni·l reys engles cui Dieus sal?
51. Cuid’aver fait son jornal?
52. Mout i aura lag engan
53. s’el a fai la messio
54. et autre fan la preiso!
55. Que l’emperaire·s percassa
56. cum Dieus cobres sa reio;
57. que primiers cre que·i secor
58. si Dieus li rent sa honor:
59. be·s taing, tan es rix lo dos,
60. qu’aitals sia·l guizerdos.

VI.

61. Al rei frances lau refassa
62. ·l tornar c’om no·l teng’a bo;
63. per qu’eu dic, s’era·i secor
64. qu’es ops, que no·s don paor,
65. e s’ar no·i vai qu’es saisos
66. dic c’aunitz es per un dos.

VII.

67. N’Azimans mout mi sap bo
68. e mout en pretz mais valor,
69. c’ab En Barral, mon seignor,
70. es mortz pretz e messios
71. aissi cum s’anc res no fos.

VIII.

72. En Totztemps, et ieu e vos
73. em l’us per l’autre joios.