I.

1. En chantan m’aven a membrar
2. so qu’ieu cug chantan oblidar,
3. mas per so chant qu’oblides la dolor
4. e·l mal d’amor,
5. et on plus chan plus m’en sove,
6. que la boca en al re non ave
7. mas en: merce!
8. perqu’es vertatz e sembla be
9. qu’ins e·l cor port, dona, vostra faisso
10. que·m chastia qu’ieu no vir ma razo.

II.

11. E pos Amors mi vol honrar
12. tant qu’e·l Cor vos mi fai portar,
13. per merce·us prec que·l gardetz de l’ardor,
14. qu’ieu ai paor
15. de vos mout major que de me,
16. e pos mos Cor, dona, vos a dinz se,
17. si mals li·n ve,
18. pos dinz etz, sufrir lo·us cove;
19. empero faitz del Cors so que·us er bo
20. e·l Cor gardatz si qom vostra maizo.

III.

21. Qu’el guarda vos e·us ten tan car
22. que·l Cors en fai nesci semblar,
23. que·l sen hi met, l’engienh e la valor,
24. si qu’en error
25. laissa·l Cors pe·l sen qu’el rete;
26. qu’om mi parla, manthas vetz s’esdeve,
27. qu’ieu no sai que,
28. e·m saluda qu’ieu no·n aug re;
29. e ja per so nuls hom no m’ochaizo
30. si·m saluda et ieu mot non li so.

IV.

31. Pero lo Cors no·s deu blasmar
32. del Cor, per mal que·il sapcha far,
33. que tornat l’a al plus honrat senhor
34. e tolt d’alhor
35. on trobav’enjan e no fe;
36. mas dregz torna vas so senhor ancse;
37. pero no cre
38. que·m denh, si Merces no·m mante,
39. que·lh intr’e·l cor tan qu’en luec d’un ric do
40. denh escoutar ma veraia chanso.

V.

41. E si la denhatz escoutar,
42. dona, merce·i deurai trobar;
43. pero ops m’es qu’oblides sa ricor
44. e la lauzor
45. qu’ieu n’ai dig e dirai jasse,
46. mas autre pro mos lauzars noca·m te
47. com que·m malme;
48. que l’ardors mi creis e·m reve,
49. e·l fuex, qui·l mou, sai que creis a bando,
50. e qui no·l mou, mor en pauc de sazo.

VI.

51. Murir puesc be,
52. N’Azimanz, qu’ieu no·m planh de re,
53. neis si·m doblava·l mals d’aital faisso
54. com dobla·l pointz del taulier per razo.

VII.

55. Chansos, desse
56. vas Monpeslier vai de part me
57. a don Guillem dir, si tot no·il sap bo,
58. sos pretz, car creis, li·m fai querre perdo.