I.

1. Dezamparatz, ses companho
2. e d’amor luenh del tot e blos,
3. cavalgava per un cambo,
4. iratz e tristz e cossiros,
5. lonc un bruelh, tro joys mi retenc
6. d’una pastoressa que vi;
7. per qu’es mos joys renovellatz,
8. quan mi remembran sas beutatz,
9. que anc pueys d’autra no·m sovenc.

II.

10. Tost dissendei sobre·l sablo
11. e vinc vas lieys de sautz coytos.
12. Elha·m ders un pauc lo mento;
13. ab un dos ris, ferm amoros,
14. me dis: «Senher, cossi·us avenc
15. que·us trastornessetz sai vas mi?
16. Quo·us etz tan de mi adautatz?
17. Qu’ieu no say que s’es amistatz,
18. per que·m luenh de vos e m’estrenc».

III.

19. «Toza, joys mi dona razo
20. per qu’ieu suy sa vengutz a vos.
21. Quan me mostretz vostra faisso,
22. sobre totz jauzens fuy joyos;
23. per que mon cor fortz e destrenc
24. ab vostr’amor, vas cuy m’acli.
25. E sia volgutz et amatz
26. lo mieus joys e·l vostre, si·us platz,
27. que jamais no rompa ni trenc».

IV.

28. «Senher, si m’amistat vos do,
29. yeu aurey nom na Malafos,
30. qu’ieu n’esper melhor guizardo
31. d’autre que cug qu’en breu m’espos.
32. Dar vos ey est cairelh que tenc!
33. E tornatz en vostre cami,
34. qu’ab autras vos etz ensajatz,
35. per semblan, don etz galiatz,
36. falsas, que fan ric joy sebenc».

V.

37. «Amiga, no·us dic oc ni no
38. de las falsas ab cor ginhos;
39. tan me platz de vos e·m sap bo,
40. que totz mals davers m’en es pros.
41. En qual que·us vulhatz vos o prenc,
42. que ieu vos plevisc e·us afi
43. que vostres suy endomenjatz;
44. e faitz de mi so que·us vulhatz,
45. neys lo cor traire ab un brenc».

VI.

46. «Senher, qui messonjas a pro
47. a semblan de ver non es tos.
48. La saviez’a Salamo
49. aondera, s’amors no fos,
50. que mur e forsa e palenc
51. fe de sen, et un franh bassi
52. no·l valc quan fo apoderatz;
53. e pus elh ne fo enganatz.
54. Gardatz en vos so qu’ieu ne prenc!»

VII.

55. «Amiga, ab autr’ochaizo
56. mi tornatz mon joy sus dejos;
57. que ja non er ni anc no fo
58. q’amors no sia bon’als bos:
59. per qu’ieu de ben amar no·m fenc,
60. que·m don’al cor joy clar e fi
61. de vos; e prec merce m’ajatz,
62. o·m metrey, si m’o alongatz,
63. hermitas el pueg de Messenc».

VIII.

64. «Senher, ja prezic ni sermo
65. non aya mai entre nos dos:
66. si m’etz amicx, amiga·us so,
67. quar tan n’etz lecx et enveyos.
68. Yeu gieti foras et espenc
69. de mon cor brau erguelh. Camgi
70. tot aissi cum vos deziratz:
71. er mos joys al vostre privatz,
72. que ses joy no valh un arenc».

IX.

73. «Amiga, ab tant ey assatz:
74. per mil vetz s’es mos joys doblatz,
75. quar en la vostr’amor atenc».

X.

76. «Senher, e vos non o digatz,
77. si tan dur cor adomesjatz,
78. als parliers, gola de blastenc».