Lo primier vers de Gr. Riquier, l’an MCCLXI.

I.

1. Ab lo temps agradiu gai
2. le cors nueus blons, de bon grat,
3. qu’ieu am, a mon cor comes
4. de far vers adrechurat;
5. e far l’ai de mascles motz,
6. ab tot lo nombre de set
7. ez ab belh chan plazentier.

II.

8. Al comensar del vers ai
9. lo nombre e l’als gardat,
10. quar hom deu gardar, so·m pes,
11. ans que comens fag honrat,
12. si·n pot estar sus o sotz;
13. per qu’ieu ab mon cor secreth
14. n’ai avut cosselh plenier.

III.

15. Lo cosselh tenc per verai,
16. mas mon Belh Deport amat
17. dey sopleyar, qu’elh m’a mes
18. captal on ai gazanhat
19. saber, don giet brancx e brotz;
20. d’als no·m valc ni·s ne penet,
21. per que·m muer de dezirier.

IV.

22. Si·n muer, blasmes no·l n’eschai,
23. quar, s’ieu l’am, no·m n’a forsat.
24. Qui·n dey blasmar, si dans m’es?
25. Non mas mon cor leugier fat,
26. que fon del mieu turmen glotz;
27. pero en tal luec [me] trieth,
28. que m’a fag de frag entier.

V.

29. Tant suy entiers, que·n murray
30. aman; ez ai m’acordat
31. que no·m vir, quar aunitz bes
32. no val tant de dan honrat.
33. Per que seray vielhs e rotz
34. d’aquest sen, tro n’aja veth
35. forsat del badalh derrier.

VI.

36. Pueys a blasmar no·m faray,
37. mas si·l Deportz qu’ay celat,
38. lo qual el mon non a tres
39. que·l sapchan, non a camjat
40. son atur, sert er a totz,
41. que·l sieus durs cors aizinet
42. com moric Guirautz Riquier.

VII.

43. Vers, quant seras apres, vay
44. al pro Amalric prezat,
45. vescomte de Narbones,
46. qu’elh a bon pretz gazanhat
47. e·l mante entier ses notz,
48. don tug sey amic son leth
49. e·ls autre ab cossirier.

VIII.

50. Solatz e chans de bon grat
51. e conortz cazon en potz
52. a mos ops, se·m breu no·m reth
53. mos Belhs Deportz alegrier.