L’octau vers d’en Gr. Riquier, l’an MCCLXXVI, en jenier.

I.

1. Karitatz ez amors e fes
2. e drechura e lialtatz
3. e chauzimens e pïetatz
4. e conoyssensa e merces
5. son ab pauc del tot abatut,
6. quar le muns es perpres d’enjan,
7. tant que·l pus l’obran a saubut,
8. qu’a penas n’esdic pauc ni gran.

II.

9. Quar baratz a lo pus perpres,
10. per que·l mais ne va galiatz,
11. que·l mals es plazens e privatz,
12. tant que per paucx es faitz le bes;
13. pero amduy son conogut,
14. e crezem que merit seran:
15. mort per mal, e per ben salut
16. per Dieu a, qui·s fa tot denan.

III.

17. Le malvatz mons fals, d’enjan ples,
18. deslials, fons de malvestatz,
19. fa cobezejar los peccatz,
20. e perdo·l tost tug sey conques,
21. e qui pus l’a privat avut
22. mais a multiplicat son dan,
23. quar si pert ez a elh perdut,
24. per qu’es pus folhs qui mais lo blan.

IV.

25. Mas gardatz quon es Dieus cortes
26. qu’el nos esta apparellatz;
27. ja tant no·ns trobara tacatz,
28. sol gardem qui em e qui es;
29. quar elh nos ten son bras tendut
30. per gandir del mortal afan,
31. ab que·l nostr’estamens se mut
32. fort peneden e ben obran.

V.

33. Dieus vol patz, mas guerra promes
34. als sieus; doncx qui er guerreiatz
35. per luy, guanditz er e salvatz,
36. sol no·s recreza, quon que·l pes.
37. E qual son aquist combatut?
38. Sylh que·l mon desamparat an
39. e de bona fe fan escut,
40. Dieu serven e lur crotz portan.

VI.

41. Recobratz fora, qui·s volgues,
42. lo luecx on Jhesus Cristz fon natz
43. e visc e fon en crotz levatz,
44. e·l sans sepulcres, on fon mes.
45. Mas en mercat o an tengut
46. li ric, em prenden que n’auran,
47. per que Dieus non lur a valgut
48. quar petit per s’amor hi fan.

VII.

49. Si prelatz, reys, comtes, marques
50. e totas autras pozestatz
51. pogues hom trobar acordat,
52. que plag ni guerra no·y agues,
53. e fosson tot li tort rendut,
54. e passesson de bon talan,
55. tost foran Sarrazin vencut
56. o combaten o prezican.

VIII.

57. La fe e l’obra de salut
58. yssause Dieus, com que l’als an,
59. e la Verges que·ns y ajut,
60. pregan son filh ab Sant Johan.

IX.

61. Reys n’Anfos, Dieus per sa vertut,
62. vos cresca poder e talan
63. del pretz que avetz mantengut
64. luy serven, enemicx sobran.

X.

65. E·m don qu’ie·l fassa selh traut
66. que·l veray peneden li fan.