I.

1. Per o car vos fegnetz de sotilment entendre,
2. vos prec qe·m respondatz, en Lafranc, ses atendre:
3. qals es la piegiers res, e si met grant e mendre,
4. qe sia en est mond, q’om tochar puesc’o prendre?
5. E si aizo·m dires, de cobleiar defendre
6. vos poires ab chascun q’ab vos voilla contendre.

II.

7. En Iacme, pos vos plac vostr’arc sobre mi tendre,
8. a zo qe·m demandatz vos voil tal respos rendre
9. don ia vos no·m poschatz encolpar ni reprendre:
10. la lengu’es tot lo piegz e·l miels c’om pot comprendre
11. e cella qi pot mais pron tener e offendre;
12. e s’al re sabetz piegz, de vos o voil aprendre.

III.

13. En Lafranc, non cugei faillissetz ad eslire,
14. mas ar avetz dig zo don pluzor faretz rire,
15. car la lengua non ha poder mas qant del dire
16. zo qe·il manda lo cor, segon lo meu albire;
17. donc es pegiers cellui, don mou lo mals: ’scondire
18. no·us en podetz, s’ieu ia haia zo q’ieu dezire.

IV.

19. En Iacme, semblan faiz qe siatz bos dormire,
20. tan tost vos oblides zo qe·m volguest devire,
21. qals fos la piegiers res c’om toche ni remire,
22. et avetz dich del cor, on hom non pot assire
23. tochar ni vista d’oill; mas qar lo·us plac escrire,
24. ieu crei qe·us aviatz prestat vostre conzire.