I.

1. Quant en bon luec fai flors bona semenza,
2. segon razon bons frugz en deu eissir;
3. per que mos cors, qu’amors a faig florir
4. de flor de ioi, tramet frug de plazenza
5. als fins amans, chanzonet’avinen,
6. qui nais d’amor e creis de benvolenza;
7. que ges estiers chanzon ni ren plazen
8. non pot hom far, si d’amor non comenza.

II.

9. Ja fo tals temps qu’eu avia crezenza
10. c’om si pogues d’amor ab sen cobrir,
11. mas ar no·l crei, anz sai, senes faillir,
12. que s’amors pren en leial cor naissenza,
13. broilan vai tan chascun iorn e creissen
14. que pren lo cor e·l gieng e l’entendenza,
15. ni cap en cors ni neis en pensamen,
16. que plus que fons regorga sa creissenza.

III.

17. Per mi o sai, qu’eu no vaill en scienza;
18. qe se tot ieu non ai sobras d’albir,
19. alques n’ai eu; mas car am senz mentir,
20. non posc celar qu’eu non fassa parvenza
21. d’amoros ioi: e per zo chant soven;
22. que maintas genz tenon a non-sabenza.
23. Mas me non cal de lur mantenemen;
24. qu’eu non quier mais, pos a midonz agenza.

IV.

25. L’amoros ris e·il gaia captenenza
26. e·il bais, que·m fei alegrar e languir,
27. vos an liurat tot mon cor per servir
28. e vos l’avez, domn’en vostra tenenza.
29. Mas que sera del ric ioi qu’eu aten?
30. Aurai l’eu ia? Hoc, sol merces vos venza;
31. Qu’eu sai que dreitz tan ric ioi non consen,
32. tan sobreval vostra valors valenza!

V.

33. Plazenz domna, aiatz en sovinenza,
34. can vos baizei, de l’amoros sospir
35. que·m venc dal cor e·m cuiet far fenir;
36. mas be·m garic adonc vostra guirenza
37. car m’apellez «douz amic» douzamen
38. e me disez qu’eu non agues temenza;
39. aissi ac pro conort de iauzimen,
40. ab c’om pogues hostar long’atendenza.

VI.

41. Ja non dig’om qu’eu fassa faillimen
42. s’ieu chan d’amor ni faz d’amor parvenza,
43. qu’aissi chantan sai la celadamen
44. cubrir, don nais mos iois ni m’entendenza.