I.

1. L’iverns vai e∙l temps s’aizina
2. e reverdejo∙il boisso
3. e par la flors en la ‘spina
4. don s’esjauzon l’auzelo;
5. Ai!
6. ja devenon d’amor gai,
7. c’usqecs vas sa par s’atrai
8. Hoc,
9. segon plazensa corina.

II.

10. Lo freig frang e la bruïna
11. contra la gentil sazo;
12. pel plais e per la gaudina
13. aug del chant la contenzo;
14. Ai!
15. si∙m met de trobar em plai
16. e dirai d’amor con vai,
17. Hoc,
18. si∙m vueil, e con revolina.

III.

19. Amars vai et ataïna
20. tric ab coratge frico
21. d’una voluntat conina
22. qe s’enpren del fuec felo.
23. Ai!
24. Non es nuls hom ses [i] chai,
25. daveras o per essai,
26. Hoc,
27. non lais del pel en l’arzina.

IV.

28. So cembel mou cor traïna
29. de son agag lo brico,
30. c’ab sospirar l’en raïna,
31. entrebrescat hoc ab no.
32. Ai!
33. Mueu talan blanc, bru e bai;
34. ab «si farai! non farai!»
35. Hoc,
36. fai al fol maigrir l’eschina.

V.

37. Bon’amors porta meizina
38. per guerir son compagnio;
39. amar los senz disciplina
40. e∙ls met a perdicio.
41. Ai!
42. Tan can l’avers dura, fai
43. al fol semblan d’amor jai,
44. Hoc,
45. e cant l’avers fail camina.

VI.

46. Domna no sap d’amor fina
47. c’ama girbaut dinz maio,
48. mas sa voluntat mastina
49. con fai lebreir’ ab gozo.
50. Ai!
51. D’aqi nasso∙il ric savai,
52. c’us no∙n fa condug ni plai,
53. Hoc,
54. si con Marcabraus declina.

VII.

55. Soudouz, esta en la cozina
56. e toca∙l foc al tuzo
57. e beu lo fum de la tina
58. de si donz na Bona∙ilh-fo.
59. Ai!
60. Eu sai con sojorn’e jai
61. e part lo gra e∙l balay;
62. Hoc,
63. so segnor engirbaudina.

VIII.

64. Qui bon’amor avezina
65. ni viu de sa liurazo,
66. honors e valors l’aclina,
67. e pretz, senes ochaio.
68. Ai!
69. Talan si al dig verai
70. e no∙il cal aver esmai
71. Hoc,
72. del trutbulurut n’Aiglina

IX.

73. Jamai no farai plevina
74. eu per la troba n’Eblo,
75. car s’entensa folatina
76. manten encontra razo.
77. Ai!
78. Q’eu dic e diz et dirai
79. q’escas es et amor brai,
80. Hoc,
81. e qi blasma amor bozina.

X.

82. Q’e∙n dic e dis et dirai
83. q’escas es et amor brai,
84. Hoc,
85. e qi blasma amor bozina.