293.32(Gaunt-Harvey-Paterson)

L’iverns vai e∙l temps s’aizina
e reverdejo∙il boisso
e par la flors en la ‘spina
don s’esjauzon l’auzelo;
Ai!
ja devenon d’amor gai,
c’usqecs vas sa par s’atrai
Hoc,
segon plazensa corina.

II.

Lo freig frang e la bruïna
contra la gentil sazo;
pel plais e per la gaudina
aug del chant la contenzo;
Ai!
si∙m met de trobar em plai
e dirai d’amor con vai,
Hoc,
si∙m vueil, e con revolina.

III.

Amars vai et ataïna
tric ab coratge frico
d’una voluntat conina
qe s’enpren del fuec felo.
Ai!
Non es nuls hom ses [i] chai,
daveras o per essai,
Hoc,
non lais del pel en l’arzina.

IV.

So cembel mou cor traïna
de son agag lo brico,
c’ab sospirar l’en raïna,
entrebrescat hoc ab no.
Ai!
Mueu talan blanc, bru e bai;
ab «si farai! non farai!»
Hoc,
fai al fol maigrir l’eschina.

Bon’amors porta meizina
per guerir son compagnio;
amar los senz disciplina
e∙ls met a perdicio.
Ai!
Tan can l’avers dura, fai
al fol semblan d’amor jai,
Hoc,
e cant l’avers fail camina.

VI.

Domna no sap d’amor fina
c’ama girbaut dinz maio,
mas sa voluntat mastina
con fai lebreir’ ab gozo.
Ai!
D’aqi nasso∙il ric savai,
c’us no∙n fa condug ni plai,
Hoc,
si con Marcabraus declina.

VII.

Soudouz, esta en la cozina
e toca∙l foc al tuzo
e beu lo fum de la tina
de si donz na Bona∙ilh-fo.
Ai!
Eu sai con sojorn’e jai
e part lo gra e∙l balay;
Hoc,
so segnor engirbaudina.

VIII.

Qui bon’amor avezina
ni viu de sa liurazo,
honors e valors l’aclina,
e pretz, senes ochaio.
Ai!
Talan si al dig verai
e no∙il cal aver esmai
Hoc,
del trutbulurut n’Aiglina

IX.

Jamai no farai plevina
eu per la troba n’Eblo,
car s’entensa folatina
manten encontra razo.
Ai!
Q’eu dic e diz et dirai
q’escas es et amor brai,
Hoc,
e qi blasma amor bozina.

Q’e∙n dic e dis et dirai
q’escas es et amor brai,
Hoc,
e qi blasma amor bozina.

Text

Edition: Simon Gaunt, Ruth Harvey and Linda Paterson 2000; notes: Linda Paterson. – Rialto 24.i.2003.

Mss.

A (28r-v), C (171v-172r), I (117r), K (103r), N (271r), R (8v), d (302v-303r), z (2 col. G).

Critical Editions / Other Editions

Previous editions: Jean-Marie-Lucien Dejeanne, Poésies complètes du troubadour Marcabru, Toulouse, 1909, p. 152 (XXXII); P. T. Ricketts, «Lo vers comenssa de Marcabru (BdT 293, 32): édition critique, traduction et commentaire», in Chrétien de Troyes and the Troubadours, ed. Peter S. Noble and Linda M. Paterson, Cambridge 1984, pp. 7-26; Vincent Pollina, «Si cum Marcabrus declina»: Studies in the Poetics of the Troubadour Marcabru, Modena 1991, pp. 24-25; Simon Gaunt, Ruth Harvey and Linda Paterson, Marcabru: A Critical Edition, Cambridge, D. S. Brewer, 2000, p. 402.

Metrics and music

Verification: a4’ b6 a4’ b6 a4’ b6 b4 a6’ c4 (Frank 266), ten nine-line stanzas and one tornada of three lines, coblas doblas, unicum; alternatively Frank 82a, note: a10 a10 a10 b10 c4, though see Ricketts’s arguments against this (‘Lo vers’, p. 7). Frank wrongly gives the ‘c’ rhyme as ‘-or’. Hans Spanke (Marcabrustudien, Göttingen, 1940, p. 17) suggests the melody may be retrievable from an anonymous trouvère song whose versification closely resembles that of Marcabru. This melody is edited by F. Gennrich, Der musikalische Nachlass der Troubadours, Darmstadt, 1958, pp. 278-279, no. 289; see also I. Fernández de la Cuesta, Las Cançons dels trobadors, Toulouse, 1979, p. 60 and p. 66.

[]