I.

1. Pois l’inverns d’ogan es anatz
2. e·l douz temps fluritz es vengutz,
3. de moutas guisas pels plaissatz
4. aug lo refrim d’auzels menutz.
5. Li prat vert e·il vergier espes
6. m’ant si faich ab joi esbaudir
7. per que·m sui de chant entremes.

II.

8. Totz lo segles es enconbratz
9. per un arbre que·i es nascutz,
10. aus e grans, brancutz e foillatz,
11. et a meravilla cregutz,
12. et a si tot lo mon perpres
13. que vas neguna part no·m vir,
14. no·n vega dels rams dos o tres.

III.

15. Empero aissi es levatz
16. e vas totas partz espandutz,
17. que lai d’outra·ls Portz es passaz
18. e·n Franssa et en Peitau vengutz,
19. q’eu sai q’el es en tal defes –
20. e dic ver segon mon albir –
21. enteir’a sa verdor ja ses.

IV.

22. E per so s’es enraïgatz –
23. c’ar greu sera mais abatutz –
24. que la raïz es malvestatz,
25. per que jovens es confondutz,
26. e tornatz en tal contrapes
27. per cels qui·l degron mantener [R]
28. que tan non cridon c’us l’ades.

V.

29. Meravil me de poestatz,
30. on a tans – jovens e canuz,
31. contes e reis et amiratz
32. e princes – en l’albre pendutz; [R]
33. mas lo latz es escarsedatz
34. que lor fai lo col flaqueïr,
35. c’us no·n espera ja·is mogues.

VI.

36. Jovens fora bautz appellatz,
37. mas ara es si recressutz
38. que ja mais non er tant onratz,
39. per que jois li sia rendutz;
40. c’avoleza l’a si conques
41. c’anc de pois no·n poc erebir
42. qe·is parti de lui dreitz ni fes.

VII.

43. Lonc temps a que no fo donatz
44. sai entre·ls baros mantengutz;
45. faiditz es e loing issillaz,
46. e lai on el es remasuz.
47. Marcabrus l’i manda salutz; [R]
48. e no·l calia tan fugir,
49. qe ja mais no sai sera pres.

VIII.

50. Non puos mudar c’als moilleratz
51. non diga lor forfaiz saubutz.
52. Non sai la quals auctoritatz
53. lor demostra qu’il sion drutz:
54. senblan fant de l’ase cortes
55. c’ab son seingnor cuidet burdir,
56. cand lo vic trepar ab los ches.

IX.

57. E d’aitals sen enraïgaz
58. los fols, e·ls savis deceubutz
59. per los acrupitz penchenatz
60. qe tot jorn demandon salutz
61. – e demandon aco per ces;
62. c’anc nuills francs hom non dec sofrir
63. c’aitals gastauz fummos tengues.