I.

1. Soudadier, per cui es jovens
2. mantengutz e jois eisamens,
3. entendetz los mals argumens
4. de las falsas putas ardens!
5. En puta, qui s’i fia,
6. es hom traïtz;
7. lo fols quan cuida ria
8. es escarnitz.

II.

9. Salamos ditz et es guirens
10. c’al prim es dousa com pimens,
11. mas al partir es plus cozens,
12. amara, cruels, cum serpens.
13. Tan sap de tricharia
14. la pecairitz,
15. que cel que ab leis se lia
16. s’en part marritz.

III.

17. De [g]uimerra porta semblan,
18. que sserp detras, leo denan,
19. bo sso el mei, que·l fai trian
20. de caladri e d’aurifan.
21. Qui depenh la bestia
22. non es faillitz
23. d’aquo qu’entendia
24. de la trairitz.

IV.

25. Puta sembla leo davan:
26. fer’es d’ergueill al comensan,
27. mas pueis, quan n’a fag son talan
28. tro que·s humil, no·s prez’un gan.
29. Quar soven per putia
30. put la mendritz,
31. com fai per bocaria
32. carnils poiritz.

V.

33. En talant ai que vos decli
34. l’us de putana serpenti:
35. que pan’al auzel son pouzi
36. s’ab l’auzelo al niu s’afri;
37. can l’a faita bauzia
38. de sos noiritz,
39. aten com per leis sia
40. mortz e delitz.

VI.

41. Eisamen qui sec son traï
42. fai putana del ric frairi;
43. quan n’a trag la bresca e·l saï,
44. li fai de la lengua bossi.
45. Ben es de gran folia
46. sals e gueritz
47. qui·s destol de sa via
48. ans que·l [c]alpitz.

(Missing)

VII.

49. Puta es de tan mal engenh
50. c’ab dous parlar cueill et asenh
51. totz cels que pot metr’en congrenh;
52. quan l’avers faill, de si·l enpenh.
53. Donx qui de sa paria
54. es encobitz,
55. soven muda e cambia
56. l’enfoletitz.

VIII.

57. Savis senatz lai no s’en pen,
58. si·l(o) ten car el vil onramen;
59. quan l’aura fag de blanc moren,
60. no·l torn e Raol envazen.
61. Totz es de garsonia
62. [esbaluitz],
63. qui met gran manentia
64. pel capladitz.

IX.

65. Puta per uzatge·s defen
66. al ric si gran loguier no·n pren,
67. lai on l’arbalesta desten,
68. on sap lo pa e vi aten.
69. Molt fai gran glotonia
70. la trichairitz
71. quan los pros laisa e tria
72. los achaïtz.