I.

1. De Dieu non puesc pauc ben parlar
2. ni mot no·us en sai yssernir,
3. quar gran res restari’a dir
4. e·l paucs es pus que non apar;
5. mas pus ylh m’abriv’en valor
6. al belh sen si cum parier, 
7. ben tanh dir a dreg per s’amor
8. so qu’al sieu poble a mestier.

II.

9. Don dic cossi deu esguarar
10. quals es ni que deu devenir,
11. e s’om so metia en cossir
12. ia res no·s deuria prezar;
13. mas l’uelh belh tenon tenebror
14. e l’esguart gloton desirier,
15. e·l cors, cossenten la folhor,
16. guida l’arm’a mal destorbier.

III.

17. De que·m puesc pro meravillar
18. cum per se non pren hom albir,
19. que, quan que·l tric, l’er a murir
20. e pel pas ansessor passar;
21. et en tan estranha flairor
22. revertis, qui pus bobansier,
23. qu’als auzens hi a gran feror:
24. mas huey oblidon aquo d’ier.

IV.

25. Mout es grieu e fort et amar
26. als trespassans de desgiquir
27. d’aysso de que·s degran aizir
28. ans que·ns sobrevengues afar;
29. qu’ieu sai que, tart si contra·l cor,
30. no·s cobri hom ben de l’arquier,
31. que del colp sentra la viguor,
32. quar trop val guarda de premier.

V.

33. Per qu’es fort grieu a castiar
34. qui trop ama son dan chauzir;
35. mas qui·s volgues tant enantir
36. vas ben cum contra mal obrar,
37. ia non perdera·l regn’aussor
38. pel ioy d’aquest mon messongier,
39. qu’a la carn caitiv’a sabor,
40. don l’os perpren gran encombrier.

VI.

41. E que·us puesc per melhor comtar
42. d’ome, si·l vei ben resplandir
43. de ren qu’el segl’ay’a formir,
44. mas ab Dieu no·s sap acordar,
45. e tot l’als es dezanador
46. e desrefugen e corsier,
47. per qu’om ren a son creator,
48. pus mor, dels faitz respos entier?

VII.

49. E pus Dieus nos denha donar
50. vezer, entendre et auzir
51. e sen e saber e sentir
52. e tanta riqueza uzar,
53. be·ns degr’esser sovenidor
54. quar qui ten fieu d’autruy terrier,
55. del pus ric e del frug melhor
56. es escas al don a ssobrier.

VIII.

57. Per qu’er escur so qu’er es clar 
58. lai on Dieus mostrara·l martir
59. qu’Elh sostenc per nos a guerir,
60. on nos sera totz a tremblar
61. lo iorn del iutjamen maior,
62. on non aura ren d’ufanier,
63. qu’ab gran gaug et ab gran dolor
64. a devezir adui semdier.

IX.

65. A, quo·s pot pauc quascus fiar
66. en quan say laissa al transir,
67. s’ilh eys no ss’o sap devezir
68. tan gen que·s puesca profichar!
69. E tan breu vid’an li pluzor,
70. vilan, roberc e cavalier,
71. e tan tost torn en amargor
72. lo ioys d’aquest segle leugier.

X.

73. Mas Dieus per sa granda doussor
74. nos don que siam sey obrier,
75. qu’El nos cuelha en resplandor
76. on li sieu sanh son eretier.