I.

1. En estiu, quan crida·l iays
2. e reviu per mieg los plays
3. iovens ab la flor que nais, 
4. adoncs es ben dregz q’om lais
5. fals’amor enguanairitz
6. als volpilhos acropitz.

II.

7. Li sordeyors els savays
8. n’an lo mielhs e·l menhs de fais:
9. pauc so prezo, qui·s n’irais.
10. Amarai pus non puesc mais,
11. que de tal amor suy guitz
12. don sai que serai trahitz.

III.

13. Perpres ai en un caslar
14. ab so que no·i aus estar;
15. empero non puesc mudar
16. de mos enemics no·m guar,
17. e ia non er assalhitz,
18. qu’en auta roca es bastitz.

IV.

19. Si·l portiers volgues iurar
20. q’autruy no·i laisses intrar,
21. segur pogra guerreiar,
22. pus al sagrament a far
23. fes mi esser escarnitz,
24. que cent en ve hom falhitz.

V.

25. . . . . . . . . . . . -atz
26. . . . . . . . . . . . -atz
27. . . . . . . . . . . . -atz
28. . . . . . . . . . . . -atz
29. . . . . . . . . . . . -itz
30. . . . . . . . . . . . -itz.

VI.

31. Adoncx dey querre solatz
32. de que sia mais prezatz,
33. quar en tal hora fuy natz
34. qu’anc non puec amar en patz:
35. totz temps ai faitz plaitz aunitz,
36. don mi tenc per avolitz.

VII.

37. Amia·m lais Dieus trobar
38. on ia no·m puesca fizar,
39. quar on plus la·n tenrai car,
40. que pes de mi enguanar:
41. adoncx mi tenc per gueritz,
42. quan mi ment de quan qu’en ditz.

VIII.

43. Assatz a que cavalg’ar
44. qui autra la vol sercar,
45. que tan quo·l cels clau la mar,
46. non pot hom una trobar
47. que no sia camiaritz 
48. o ves drutz o ves maritz.

IX.

49. Totz temps deu esser marritz
50. qui d’aital amor es guitz.