I.

1. Amors, cum er, que farai?
2. morrai frescs joves e sans,
3. enaissi dins vostras mans?
4. oc, murir: si·m pliu per vos,
5. ades mi pliu pauc mos pros;
6. e totz temps tan cum ieu viva,
7. cum que m’en an, mi pliurai.

II.

1. Per qu’ieu fatz avol essai
2. pos aissi vos sui humans:
3. que fera s’ie·us fos trefans,
4. mals e fels et ergulhos?
5. fora·n plus aventuros:
6. oc, per que ar m’ès esquiva,
7. que ieu ves vos franc cor ai.

III.

1. Ades mi datz plus d’esmai
2. on mielhs sui vas vos certans,
3. e fatz i ben que vilans:
4. quar per mal sui amoros,
5. mas non sai esser antos
6. vas vos, qu’ades recaliva
7. mos leus cors on piegz m’en vai.

IV.

1. Mas vos avetz, don morrai,
2. amors, l’us que Barrabans:
3. que·ls vostres fatz soteirans
4. qu’estan mal, per qu’ieu viu blos,
5. non faitz ges als plus iros,
6. mas vas aquel ès ombriva
7. qu’avetz en poder ses plai.

V.

1. Per que si·m peza dirai,
2. amors, ves vos tan que cans;
3. ades o dic: sui aurans
4. de vos! qu’anc mala sai fos
5. nostr’aventura mest nos!
6. e tem dir, calacom pliva,
7. so que·us cofon e·us dechai.

VI.

1. Mas ieu o dic, e si·n brai
2. ni m’en desmen hom vilans,
3. venga armatz en us plans:
4. e sia orbs o gelos
5. s’ieu non volria esser jos
6. vencutz: qui·s vol so escriva!
7. sol vers no fos! si·m n’esglai.

VII.

1. Mas non es de mar en sai,
2. ni lai on es flums Jordans,
3. sarrazins ni crestians
4. qu’ieu non venques tres o dos;
5. e s’ieu dic que enoios,
6. ma grans dolors m’en abriva
7. que·m fai ver dir, e no·m plai.

VIII.

1. E si eu fatz semblan gai
2. ni·m depenh coindes e vans,
3. si tot m’ai bos ermitans
4. estat et enquar ploros:
5. e bos hom religios
6. serai tot per gen celiva
7. totz temps, si·l cor no m’en trai.

IX.

1. E ma chansos, si no fos
2. alques ves amor esquiva,
3. tengra ves Rodes en lai.

X.

1. Comtessa nominativa,
2. pros e bella ab cor verai.