I.

1. Pois q’en midonsz es tan d’onor e sen
2. – caps e fis es de presz e de valors –,
3. be degra haver temench’e paors
4. de faillir ne dir cho qe no foss gen.
5. Mais ieu per aicho de re non m’esmai,
6. ansz·s taing q’ieu sia adess plus fis e gai,
7. q’insz en mo cor hai tals esseinhamentz
8. qi·m ve vas lei, on es prez e ioventz,
9. perq’ieu no puosc ges nuilla re faillir.

II.

10. Be dei haver bon cor e fi talen,
11. pois mon Treszor m’esseinha ez Amors.
12. Ia dansz no·m po tener losengadors
13. de lei no diga cho q’er avenen.
14. Tan m’abellis midonz e tan mi plai
15. sa benenancha q’es, aicho sapchai,
16. de totas soberaina e plasentz;
17. ez am trop mais sos dolz captenementz
18. de nuilla autra qi·m poges enriqir.

III.

19. Valentz domna de grantz esseignhamen,
20. cui Dieus ha datz tan gratz e tant honors
21. qe de sa man no fesz tan grantz luszors,
22. – luna ne sol no par tan resplanden –,
23. qan meillz es scurs, plus clar q’al tenps de mai
24. resplend on es, qan par lo sol ne·l rai;
25. ieu clam merce midon tan dolchamentz
26. de mo maltraich aissi del grantz tormentz
27. q’ieu hai soffert per lei, cui tan deszir.

IV.

28. Ar sai eu be qe dit ai faillimen,
29. qar no·l pessei qan diss tan grantz folors.
30. A lei mi ren merce per sas dolchors,
31. q’ades de cel q’ieu dis ieu me repen.
32. No voill ia dir q’ar ieu per lei mal trai,
33. ansz creis adess lo grantz deszirs q’ieu hai
34. de lei onrar, qe totz mos pessamentz
35. i ai mes; ia n’er de cho faillimentz
36. qe·m retraia d’amar lei e servir.

V.

37. Meillz de domna, tan vos am finamen
38. no·m puosc astrair de dir vostras lauszors.
39. Be sai qe trop plus senatz lauszadors
40. no poirian retrair tot eissamen
41. lo presz e·l sen e·l gai solasz qe·m fai
42. amar; e ia da lei no·m partrai
43. mentre qe viu: serai so bevolentz
44. e totz aclis aissi enteiramentz
45. per la meillor q’el mond poges chiausir.

VI.

46. Ves tramontana va tost e corren
47. a mon Treszaur e di, se no·m secors,
48. dan cobrara del sieu fis amadors,
49. e se lui perd no i er pros de nien,
50. ansz li er dansz, qan sos amicx deschai.
51. Merce li clam tan mais q’ieu dir no·l sai.
52. Dieus, qant veirai son bel cors tan iausentz?
53. Q’ieu tan deszir con lei star solamentz,
54. tan q’ieu en ver no·l sai retrair ne dir.

VII.

55. Midonsz sa be mo cor senes qerer:
56. tan ha de sen e tan es conoissentz
57. q’en lei es totz lo maltraig e·l garir.