1 Bernartz de Ventadorn si fo de Limozin, del castel de Vendedorn. 2 Hom fo de paubra generation, fills d’un sirven que era forniers, q’escaudava lo forn per cozer lo pan del castel de Ventedorn. 3 E venc bels hom et adreitz, e saup ben trobar e cantar, et era cortes et enseignatz. 4 E·l vescoms de Ventedorn, lo sieus seigner, si s’abellic mout de lui e de son trobar e de son chantar, e fetz li grand honor. 5 E·l vescoms de Ventedorn avia moiller q’era bella e gaia e gentils. 6 Et abellic se d’En Bernart e de las soas cansons et enamoret se de lui et el de lieis, si q’el fetz sos vers et sas chansons d’ella, de l’amor q’el avia ad ella e de la valor de lieis. 7 Lonc temps duret lor amors anz qe·l vescoms ni las autras gens s’en aperceubessen. 8 E qand lo vescoms s’en aperceup et el s’estraignet de lui, e la moiller fetz serrar e garzar. 9 E la dompnna fetz adoncs dar comiat a·N Bernart, e qe·is partis e·is loignes d’aqella encontrada. 10 Et el s’en partic et anet s’en a la duqessa a Normandia, qu’era ioves e de gran valor e s’entendia en pretz et en honor et en bendich de sa lauzor. 11 E plazion li fort li vers e las chanssons d’En Bernart, et ella lo receup e l’acuillic molt fort. 12 Lonc temps estet en sa cort, et enamoret d’ella et ella de lui, e·n fetz maintas bonas chanssons d’ella. 13 Mas lo reis Henrics d’Englaterra la tolc per moiller e la trais de Normandia e menet l’an en Englaterra. 14 En Bernartz remas de sai tristz e dolens, e venc s’en al bon comte Raimon de Tolosa, et ab lui estet entro que·l coms mori. 15 E qand lo coms fo mortz, En Bernartz si rendet a l’orden de Dalon e lai el fenic. 16 E so q’ieu ai escrit de lui si me comtet lo vescoms N’Ebles de Ventedorn, qui fo fills de la vescomtessa q’En Bernartz de Ventedorn amet. Et aqui de las soas chanssons.