1 Guillems de Saint Leidier si fo us rics castellans de Veillac, de l’evescat del Poi Sainta Maria. 2 E fo honratz hom e bons cavalliers d’armas, e larcs e donaire d’aver e mout enseignatz e cortes e mout fins amaire, e mout era amatz e grazitz. 3 Et entendet en la marquesa de Polomiac, que era sors del Dalfin d’Alvernge e de Na Sail de Claustra, e moiller del vescomte de Polomiac. 4 E·N Guillems de Saint Leidier si fazia sas chansos d’ella e l’amava per amor. Et diziha li «Bertran», q’el dizia atressi «Bertran» a·N Hugo Marescalc, q’era sos compains. 5 Et el sabia totz los faitz e·ls ditz d’En Guillem e de la marquesa ; e tuich trei se clamavon «Bertran» l’uns l’autre. 6 Mout aviant grand alegranssa tuich trei; mas a·N Guillem de Saint Leidier tornet en gran tristessa, qe·il dui Bertran feiron gran fellonia de lui e gran vilania.