1Iaufres Rudels de Blaia si fo molt gentils hom, princes de Blaia. 2 Et  enamoret se de la comtessa de Tripol, ses vezer, per lo gran ben e per la gran cortesia q’el auzi dir de lieis als pelegrins que vengron d’Antiochia. 3 E fetz de lieis mains bons vers et  ab bons sons, ab paubres motz. 4 E per voluntat de lieis vezer, el se crozet e mes se en mar, per anar lieis vezer. 5 Et adoncs en la nau lo pres mout grans malautia, si que cill qui eron ab lui cuideron qe el fos mortz en la nau. 6 Mas tant feiron que∙ill lo conduisseron a Tripol, en un alberc, cum per mort. 7 E fo faich a saber a la comtessa, e venc ad el, al sieu lieich e pren lo entre sos bratz. 8 Et el saup qu’ella era la comtessa, si recobret lo vezer e·l flazar, e lauzet Dieu e·l grazi, qe∙ill avia la vida sostenguda tro qu’el l’ages vista; et enaissi el moric entre·ls braz de la comtessa. 9 Et ella lo fetz honradamenz e sepeilir en la maison del temple de Tripol; e pois, en aqel meteus dia, ela se rendet morga, per la dolor que ella ac de lui e de la soa mort. 10 Et aqui son escriutas de las soas chanssons.